ރަހުމު ކުޑަ ގޮތަކަށް މަރާލާފައިވާ ބްލޮގަރ ޔާމީން ރަޝީދުގެ މަރުގެ މައްސަލައިގައި ބައިވެރިވިކަމުގެ ތުހުމަތުކޮށް ޝަރީއަތް ކުރިޔަށް ގެންދާ މީހުންގެ މައްޗަށް ހުކުމް އިއްވުން މާދަމާއަށް ކްރިމިނަލް ކޯޓުން ތާވަލުކޮށްފި އެވެ.
ޔާމީންގެ މަރުގެ މައްސަލައިގައި ހުލާސާ ބަޔާން އިއްވުމުގެ އަޑުއެހުން ބޭއްވީ މިދިޔަ ނޮވެމްބަރު 18 ގަ އެވެ. ޖިނާއީ އިޖުރާއަތުގެ ގާނޫނުގައި ބުނާ ގޮތުން، ހުލާސާ ބަޔާން އިއްވާތާ 30 ދުވަހުގެ ތެރޭގައި ހުކުމް އިއްވަން ޖެހޭނެ އެވެ. އެ މުއްދަތު ފަނަނަޅައި ގޮސްފައިވާއިރު، ކްރިމިނަލް ކޯޓުން މިދިޔަ ޑިސެމްބަރު ހުކުމް އިއްވުމުގެ އަޑުއެހުން ފަސްކުރީ ޔާމީންގެ އާއިލާއިން އެދިގެންނެވެ. އެއީ އާއިލާ ބައެއްގެ ސިއްހީ ހާލަތު ގޯސްވުމުންނާއި، މައްސަލައިގައި ދައުވާ އުފުލާފައިވާ މީހުންގެ މައްޗަށް ކުށް ސާބިތުވެއްޖެ ނަމަ ވާރިސުންގެ ބަސް ނަގަން ޖެހޭތީ އާއިލާއަށް ހާޒިރު ވެވޭ ދުވަހަކަށް ތާވަލު ކުރުމަށެވެ.
ކްރިމިނަލް ކޯޓުން މައްސަލައިގެ ހުކުމް އިއްވުން ތާވަލުކޮށްފައި ވަނީ މާދަމާގެ ހެނދުނު 10:00 އަށެވެ.
މާދަމާއަށް ޔާމީންގެ މަރުގެ މައްސަލައިގެ ހުކުމް އިއްވުން ތާވަލު ކުރިއިރު، ތުހުމަތުވާ މީހުންގެ މައްޗަށް ކުށް ސާބިތު ކުރުމަށް ދައުލަތުން ހުށަހެޅި ސިއްރު ހެކިވެރިންގެ މައުލޫމާތު ލީކުވެ އެ މީހުންގެ ނަން އަނބުރާ ގެންދަން އިންޒާރު ދޭ މައްސަލަ ބަލައިދޭން ޕްރޮސެކިއުޓާރ ޖެނެރަލްގެ އޮފީހުން ވަނީ ފުލުހަށް ހުށަހަޅާފަ އެވެ.
އޭޕްރީލް، 2017 ގައި ޔާމީން ދިރިއުޅުނު ގޭގެ ސިޑި ގޮޅި ތެރޭގައި ތޫނު އެއްޗެހިން ހަމަލާދީ އަނިޔާވެރި ގޮތަކަށް ޔާމީން މަރާލި މައްސަލާގައި ދައުލަތުން ދައުވާ ކުރަނީ ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ކުދެހިގޭ ހަސަން ޝިފާޒްގެ އިތުރުން މ. ތާއިފް އިސްމާއިލް ރަޝީދު އަދި މ. ކޮޅުފުށީ އީސްޓް، ހުސައިން ޒިޔާދުގެ މައްޗަށެވެ. އެ މީހުންގެ މައްޗަށް ކުރަނީ ތޫނު އެއްްޗެއް ބޭނުން ކޮށްގެން ގަސްދުގައި މީހަކު މެރުމުގެ ދައުވާ އެވެ.