ޖުވެނައިލް ޑިޓެންޝަން ސެންޓަރުގެ ނަތީޖާ ފެންނާނީ ގުޅިގެން ކުރާ މަސައްކަތުން: އިމްރާން

ކުށްކުރާ ކުޑަކުދިން ބޭތިއްބުމަށް މޯލްޑިވްސް ކަރެކްޝަނަލް ސަރވިސްގެ އައްސޭރި ޖަލުގައި ޤާއިމްކުރެވުނު ޖުވެނައިލް ޑިޓެންޝަން ސެންޓަރުގެ ނަތީޖާ ފެންނާނީ މުއައްސަސާތަކުން ބގުޅިގެންކުރާ މަސައްކަތުންކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

ސެންޓަރު ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންމިނިސްޓަރ އިމްރާން ވިދާޅުވީ ރާއްޖޭގައި ކުށްކުރާ ކުޑަކުދިންގެ މައްސަލައަށް އެކަށީގެންވާ ޙައްލެއް ހޯދުމަށް ކުރެވުނު މަސައްކަތްތަކުން މުޙިއްމު ފިޔަވަޅެއް މިއަދު އެޅިގެންދާ ދުވަހެއްކަމުގައެވެ. މި މަރުކަޒު މިއަދު ފެށިގެންދާއިރު، މި މަރުކަޒުން ކުރެވޭ މަސައްކަތުގެ ނަތީޖާ ނިކުމެގެންދާނީ މިކަން ހިންގުމުގައި އެކި ގޮތްގޮތުން ޝާމިލްވާ ދަޢުލަތުގެ މުވައްސަސާތަކުގެ ތެރެއިން މުޙިއްމު 5 މުވައްސަސާއެއް މަސައްކަތްކޮށްގެން ކަމުގައި މިނިސްޓަރ ވިދާޅުވިއެވެ. ދިވެހި މުޖްތަމަޢުއަކީ ކުށް މަދު، ކުށުން ސަލާމަތްވެފައިވާ އަދި ވަކިން ޚާއްސަކޮށް ކުޑަކުދިން ކުށްކުރާ މިންވަރު މަދު މުޖްތަމަޢުއަކަށް ވުމަށް ދެކި ވަޑައިގަންނަވާކަމަށްވެސް މިނިސްޓަރ ވިދާޅުވިއެވެ.

މީގެ އިތުރުން ކޮންމެ މުޖްތަމަޢުއެއްގައިވެސް އެ މުޖްތަމަޢުއެއްގެ މިންގަނޑުތަކުން ބޭރުވާ މީހުންނާއި ކުޑަކުދިން ތިބެދާނެކަމަށާއި، އެ ކުދިންނާއި މީހުންނާ މުޢާމަލާތްކުރުމުގައި އެ ފަރާތްތަކަށް ރިއާޢަތްކޮށް މުޢާމަލާތްކުރުމަކީ އިސްލާމްދީން ދަސްކޮށްދެއްވާ ކަމެއްކަމުގައި މިނިސްޓަރ ވިދާޅުވިއެވެ. އަދި މި މަރުކަޒު ބަލަހައްޓާ މުވައްޒަފުންނަކީ އެހެން މީހުންނަށްވުރެ ކެތްތެރި، އިޙްސާންތެރި ބަޔަކަށްވެ، އެ ކުދިންގެ ކިބައިން ފެންނަ ނޭދޭވޭ ކަންތައްތަކުން އެ ކުދިން ސަލާމަތްކުރުމަށް މަސައްކަތްކޮށް، އެ ކުދިން މުޖްތަމަޢުއަށާއި ޢާއިލާއަށް އަނބުރާ ދެވޭނެ ބަޔަކަށް ހަދައި އެ ކުދިންނާ މުޢާމަލާތްކޮށް ރިވެތި އަޙްލާޤު ދަސްކޮށްދޭނެ ބަޔަކަށް ވުން ކަމުގައި މިނިސްޓަރ ވިދާޅުވިއެވެ.

“ޖުވެނައިލް ޑިޓެންޝަން ސެންޓަރުގެ ނަތީޖާ ފެންނާނީ ގުޅިގެން ކުރާ މަސައްކަތުން” މިނިސްޓަރ އިމްރާން

ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުގެ ވާހަކަފުޅުގައި މި ޤާއިމުކުރެވޭ ޖުވެނައިލް ޑިޓެންޝަން ސެންޓަރަކީ ކުޑަކުދިންގެ ޢަދުލުގެ ޤާނޫނުގެ ދަށުން މޯލްޑިވްސް ކަރެކްޝަނަލް ސަރވިސްގެ މައްޗަށް ލާޒިމްކޮށްފައި އޮތް ވަރަށް މުޙިއްމުކަމެއްގެ ފެށުން ކަމުގައި ވިދާޅުވިއެވެ. އަދި މިއީ ވޭތުވެ ދިޔަ 50 އަހަރު މޯލްޑިވްސް ކަރެކްޝަނަލް ސަރވިސްއިން ޖަލުތައް ބެލެހެއްޓުމަށާއި ޖަލަށް ޙުކުމްކުރާ ފަރާތްތަކުގެ ރިހެބިލިޓޭޝަންގެ މަސައްކަތްތަކަށް އިތުރުވެގެންދާ ކަމެއްކަމުގައި ވިދާޅުވިއެވެ. އަދި މިއަދަކީ ޖަލެއްގެ އިތުރުން މަރުކަޒެއް ބަލަހައްޓާނެ ޚާއްސަ މަސްޢޫލިއްޔަތާ ރަސްމީކޮށް ޙަވާލުވާ ދުވަސްކަމަށާއި، ކުޑަކުދިންގެ ޢަދުލުގެ ޤާނޫނު ވުޖޫދުވެގެން އައިސް، އެ ޤާނޫނަށް ނަޒަރު ހިންގާލާއިރު ޖަލުތަކާއި ޕެރޯލް ޤާނޫނުން އެމްސީއެސްއަށް ލާޒިމްކުރާ ކަންކަމުގެ އިތުރުން މުޅިން އެހެން ނިޒާމެއްގެ ތެރެއިން ކުޑަކުދިންނާ މެދު ޢަމަލުކުރެވޭނީ އެ ކުދިންގެ އެންމެ “ބެސްޓް އިންޓްރަސްޓްސް” އޭގެ ތެރޭގައި ހިމެނިގެންކަން ބަޔާންކޮށް ޚާއްސަ އިޖުރާއަތެއް ލިޔެވި، ކުޑަކުދިންނަށް ޚާއްސަ މަރުކަޒެއް ގާއިމުކުރެވިގެންދާކަމުގައި ކޮމިޝަނަރ ވިދާޅުވިއެވެ.

މި މަސައްކަތަކީ 2019 ގެ އެމްސީއެސްގެ ބަޖެޓް ގެ ތެރެއިން ފަށައިގަނެވުނު މަސައްކަތެއްކަމަށާއި މިކަމަށް ގާތްގަނޑަކަށް 3.5 މިލިއަން ރުފިޔާ ޚަރަދުކުރެވިފައިވާކަމަށާއި މި މަސައްކަތަކީ އައްސޭރި ޖަލުގެ ވަރަށް ގިނަ މުވައްޒަފުންގެ ޤުރްބާނީއާއެކުގައި އަދި އެ ޖަލުގެ ގިނަ ޤައިދީންގެ ވަރަށް ބޮޑު ބައިވެރިވުމާއެކު ޤާއިމުކުރެވިގެންދާ މަސައްކަތެއްކަމުގައި ސީޕީ ފާހަގަކުރެއްވިއެވެ. އަދި ޤާނޫނުން ލާޒިމްކުރާ ފަދައިން މަރުކަޒުގައި މަސައްކަތްކުރާނެ ޚާއްސަ އޮފިސަރުން ޢައްޔަކުކުރެވިފައިވާކަމަށާއި އެ މުވައްޒަފުންނަށް ބޭނުންވާ ތަމްރީންތައް ދިނުމުގެ މަސައްކަތް ފަށައިގަންފައިވާކަމަށް ކޮމިޝަނަރ އޮފް ޕްރިޒަންސް ވިދާޅުވިއެވެ.

ހަމައެއާއެކު އިތުރު ތަމްރީނާއި ހުނަރު މުވައްޒަފުންނަށް ބޭނުންވާނެކަން ފާހަގަކުރައްވާ ކުރިއަށްއޮތްތަނުގައި އެމްސީއެސްގެ މަސައްކަތްތައް ރާވާ ބައްޓަންކުރަމުންގެންދާނީ މި މަރުކަޒު ބެލެހެއްޓުމުގައި ޢަމަލީ ގޮތުން ހަރަކާތްތެރިވާ މުވައްޒަފުންނަށް ބޭނުންވާނެ ފަންނީ ލަފަޔާ އިރުޝާދު އަދި ތަމްރީންތައް ލިބޭނޭގޮތަށް ކަމުގައި ސީޕީ ވިދާޅުވިއެވެ. އަދި އައްސޭރި ޖަލުގެ ހީވާގި އޮފިސަރުންނަށާއި ގައިދީންނާއި އެމްސީއެސްގެ ކުރީގެ ބައެއް މުވައްޒަފުންނާއި ކޮމިޝަނަރުންގެ އަގުހުރި އެހީތެރިކަމަށް ޝުކުރުއަދާކުރެއްވިއެވެ. މީގެ އިތުރުން ޕްރިޒަން ކޯޕަރޭޓިވް ސޮސައިޓީއަށާއި ޔުނިސެފް މޯލްޑިވްސްއިން ވެދެއްވި އެހީތެރިކަމަށް ޝުކުރުއަދާކުރައްވައި، މީގެ ކުރިން ޖަލުގައި ތިބި ކުދިންނަށް ތަޢުލީމީ އެހީތެރިކަން ފޯރުކޮށްދެއްވަމުންދާ ހިންމަފުށީ ސްކޫލާއި ކައުންސިލަށް ސީޕީ ޝުކުރުއަދާކުރެއްވިއެވެ.

މި ސެންޓަރަކީ ކުޑަކުދިންގެ ޢަދުލުގެ ޤާނޫނު އަދި ޔުނައިޓެޑް ނޭޝަންސްގެ މިނިމަމް ސްޓޭންޑަރޑް ފޮރ ދަ ޓްރީޓްމަންޓް އޮފް ޕްރިޒަނަސް (މަންޑޭލާ ރޫލްސް) ގައި ބަޔާންކޮށްފައިވާ ކަންތައްތަކާ އެއްގޮތަށް ޤާއިމްކުރެވުނު ސެންޓަރެކެވެ.މި ސެންޓަރުގެ ކޮންމެ ގޮޅިއެއްގައި 02 ކުދިންގެ ޖާގަ ހުންނަ 08 ގޮޅި މި ސެންޓަރުގައި އެކުލެވިގެންވެއެވެ.

މި ސެންޓަރުގައި މަސައްކަތްކުރުމަށް ޖުމްލަކޮށް 16 އޮފިސަރުން ތަމްރީން ކުރެވިފައިވާއިރު، މިވަގުތު ޑިއުޓީ ކުރާނީ ޖުމްލަ 07 އޮފިސަރުންނެވެ. މި އޮފިސަރުންނަށް ކުޑަކުދިންގެ ޢަދުލުގެ ޤާނޫނު، ޔޫއެންގެ މިނިމަމް ސްޓޭންޑަރޑް ފޮރ ދަ ޓްރީޓްމަންޓް އޮފް ޕްރިޒަނަސް (މަންޑޭލާ ރޫލްސް)، ކުޑަކުދިންގެ ޙައްޤުތަކާބެހޭ ޤާނޫނު، ކުޑަކުދިންގެ ޙައްޤުތަކާބެހޭ ބައިނަލްއަޤްވާމީ މުއާހަދާ (ބެއިޖިންގ، ބެންކޮކް ކޮންވެންޝަން)، ކުޑަކުދިންނާ މުޢާމަލާތްކުރާނެ ގޮތް، އިންޑިވިޖުއަލް ލަރނިންގ އަދި ބައިނަލްއަޤްވާމީ ބެސްޓް ޕްރެކްޓިސްތަކާއެއްގޮތަށް ވަނީ ތަމްރީންތައް ފޯރުކޮށްދެވިފައެވެ.

މި ސެންޓަރުގައި ބައިތިއްބާ ކުޑަކުދިންނަށް ކުދިންނަށް އެއްވެސް ހުއްޓުމެއްނެތި، އުމުރާ ގުޅޭގޮތުން ކިޔެވުމުގެ ފުރުޞަތުއޮންނާނެއެވެ. މީގެ އިތުރުން ނަފްސާނީ އެހީތެރިކަން ފޯރުކޮށްދިނުމުގެ ގޮތުން ކައުންސެލިންގ އަދި ސައިކިއަޓްރިކް ސެޝަންތައް ފޯރުކޮށްދިނުމާއި އިސްލާމީ ކައުންސެލިންގ ދިނުމާއި ލައިފް ސްކިލްސް ކިޔަވާދޭނެއެވެ.