ވައިގެ މަގުން ރާއްޖެއަށް ގިނަ އަަދަދެއްގެ މަސްތުވާތަކެތި އެތެރެކުރި ބްރެޒިލް ދެ ރައްޔިތުންގެ ބަންދަށް ފަސް ދުވަސް ޖަހައިފިއެވެ.
ކަސްޓަމްސް އިން އިއްޔެ ނެރުނު ބަޔާނެއްގައި ބުނެފައިވަނީ އިއްޔެ ބްރެޒިލް އިން ރާއްޖެ އައި އުމުރުން 21 އަހަރުގެ ބްރެޒިލް ފިރިހެނަކާއި، އުމުރުން 23 އަހަރުގެ ބްރެޒިލް އަންހެނެއްގެ އަމަލުތައް ހުރިގޮތުން ޝައްކުކުރެވިގެން އެމީހުންގެ ލަގެޖް އިތުރަށް ބަލައި ފާސްކުރިއިރު އެ ދެމީހުންގެ ލަގެޖުން މަސްތުވާތަކެތި ކަމަށް ޝައްކުކުރެވޭ އެއްޗެއް ފެނިފައި ވާ ކަމަށެވެ.
ފެނުނު ތަކެތި ކަސްޓަމްސް އިން ފުރަތަމަ މަރުހަލާގައި ޓެސްޓްކުރި އިރު، މަސްތުވާތަކެތީގެ ބާވަތެއް ކަމަށްވާ ކޮކެއިންއަށް ޕޮޒިޓިވް ވެފައިވާ ކަމަށާއި 21 އަހަރުގެ ފިރިހެން މީހާގެ އަތުން އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި 1.760 ކިލޯގުރާމް ހުރި އިރު، 23 އަހަރުގެ އަންހެން މީހާގެ އަތުން އަތުލައިގަނެވުނު މަސްތުވާތަކެތީގެ ޖުމުލަ ބަރުދަނުގައި 2.503 ކިލޯގުރާމް ހުރިކަމަށެވެ.
މިމައްސަލައިގައި އެ ދެމީހުންގެ ބަންދަށް، ކްރިމިނަލް ކޯޓުން އިއްޔަ ފަސް ދުވަސް ޖަހާފައިވަނީ އެ ދެމީހުންވެސް ވަކީލާ އެކު ބަންދު އަޑުއެހުން ކުރިއަށް ގެންދިއުމަށް ބޭނުންވާކަމަށް ބުނެފައިވާތީއެވެ.
ޖުމުލަ 4.263 ކިލޯގްރާމްގެ މަސްތުވާތަކެތި މި ދެމީހުންގެ އަތުން އަތުލައިގެންފައިވާއިރު އެތަކެތީގެ މަގުމަތީއަގު 21،315،000.00 ރުފިޔާއަށް އަރާނެ ކަމަށް ކަސްޓަމްސްއިން ބުނެފައިވެއެވެ.
advertisment