ހުސްވެފައިވާ ޅ. ކުރެންދޫ ކައުންސިލްގެ ރައީސް ހޮވުމަށް މިއަދު ބޭއްވި ބައި އިލެކްޝަން އިދިކޮޅު ޕީޕީއެމްގެ ކެނޑިޑޭޓު އިސްމާއިލް މަދީހު ކާމިޔާބުކޮށްފި އެވެ.
ކުރެންދޫ ކައުންސިލްގެ ރައީސްގެ މަގާމު ހުސްވީ، އެ މަގާމުގައި ހުންނެވި އެމްޑީޕީގެ މެމްބަރު އިބްރާހިމް ސިމާއު މަގާމުން އިސްތިއުފާ ދެއްވުމުންނެވެ.
އިންތިހާބު ކާމިޔާބު ކުރި، އިސްމާއިލް މަދީހުއަކީ މީގެ ކުރިން ވެސް ކައުންސިލްގައި ދެ ދައުރު ފުރިހަމަ ކުރެއްވި ބޭފުޅެކެވެ. މަދީހުގެ ކެމްޕެއިން ހަރަކާތްތަކުގައި އިދިކޮޅުގެ ލީޑަރު އަދި ޕީޕީއެމްގެ ރައީސް، ރައީސް އަބްދުﷲ ޔާމީން ބައިވެރިވެވަޑައިގެންނެވި އެވެ.
މި ގޮނޑިއަށް އެމްޑީޕީގެ ޓިކެޓުގައި ވާދަ ކުރެއްވީ އަލީ ނަސީރެވެ. އަލީ ނަސީރުގެ ކެމްޕެއިން ހަރަކާތްތަކުގައި ޕާޓީގެ ރައީސް މުހައްމަދު ނަޝީދާއި ލީޑާޝިޕްގެ ބޭފުޅުން ދާއިރާއަށް ބައިވެރިވެވަޑައިގެންނެވި އެވެ.
އިންތިހާބުގެ ނަތީޖާ ދައްކާ ގޮތުގައި ނަސީމަށް ލިބިވަޑައިގަތީ 566 ވޯޓެވެ. އަދި މަދީހަށް 615 ވޯޓެވެ.
އަދި އިދިކޮޅުން ގޮނޑި ކާމިޔާބު ކުރީ އިންތިހާބަށް އިއުލާނުކޮށްފައި ވަނިކޮށް ރަށުގައި މަޝްރޫއުތަކެއް ފަށައި އިތުރު ބައެއް މަސައްކަތްތައް ކޮށްދޭނެ ބަޔަކު ހޯދަން އިއުލާނުކޮށްފައި ވަނިކޮށެވެ. މި އަހަރުގެ ތެރޭގައި ފަށާނެކަމަށް ބަޖެޓުކޮށްފައި އޮތް އެ ދެ މަޝްރޫއު އަކީ ރަށުގެ ފެނާއި ނަރުދަމާގެ މަސައްކަތް އަދި ގޮނޑުދޮށް ހިމާޔަތް ކުރުމުގެ މަސައްކަތެވެ.
މީގެ އިތުރުން ހައުސިންގެ މަޝްރޫއު ވެސް އިއުލާނު ކުރި އެވެ.
advertisment