ކުނިވާ ޒާތުގެ ކުނިތަކެއް ކަނޑަ އެޅި މައްސަލައިގައި އަލިމަތަ ރިސޯޓު ޖޫރިމަނާކޮށްފިއެވެ.
އެންވައިރޮމެންޓް ޕްރޮޓެކްޝަން އެޖެންސީ(އީޕީއޭ) އިން ނެރިފައިވާ ބަޔާނެއްގައި ބުނެފައިވާގޮތުން، ވ.އަލިމަތަ ރަށުގައިވާ ނަކައި ރިސޯޓު ގުރޫޕުގެ، ނަކައި އަލިމަތަ ރިސޯޓުންވަނީ، ކުނިވާޒާތުގެ ކުނިތަކެއް ކަނޑަށް އަޅައިފައިއެވެ. އަދި އެ އަމަލު ކުނި މެނޭޖް ކުރުމުގެ މިންގަނޑުތަކާއި ހިލާފުވާކަމަށްވެސް އީޕީއޭއިން ބުނެފައިވެއެވެ.
އަލިމަތަ ރިސޯޓުން ކުނިވާ ޒާތުގެ ކުނިތަކެއް ކަނޑަށް އެޅުމުން އެ އަމަލު ކުނި މެނޭޖް ކުރުމުގެ ގަވައިދައި ހިލާފުވާކަމަށް ފާހަގަކޮށް، އީޕީއޭއިން ނެރިފައިވާ ބަޔާނުގައި ބުނެފައިވަނީ، އެހެންކަމުން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން، އަލިމަތަ ރިސޯޓު ޖުމުލަ 312,750 ރުފިޔާއިން ޖޫރިމަނާ ކުރާކަމަށެވެ.
މީގެ އިތުރުން ބަޔާނުގައި ބުނެފައިވަނީ، ޖޫރިމަނާގެ ފައިސާތައް ތިރީސް ދުވަހުގެ މުއްދަތެއްގެ ތެރޭގައި އަލިމަތަ ރިސޯޓުން އީޕީއޭއަށް ދެއްކުމަށްވަނީ އެންގިފައިކަމަށެވެ.