އައިއީޑީއެއް ގޮއްވާލައި ކުރީގެ ރައީސް މުހައްމަދު ނަޝީދު އަވަހާރަކޮށްލަން މަސައްކަތް ކުރި މައްސަލައިގައި ދައުވާ އުފުލާފައިވާ މީހުންގެ މައްސަލަ ކުރިޔަށް ގެންދާ ޝަރީއަތުގެ ބެންޗުގެ ހުސްވެފައިވާ މަގާމަށް ގާޒީ ހުސެއިން ފާއިޒް ރަޝާދު ހަމަޖައްސައިފި އެވެ.
2021، މޭއި 06 ގައި ރައީސް ނަޝީދަށް އަމާޒުކޮށް ހަމަލާއެއް ދީފައިވަނީ ރައީސް ނަޝީދު އޭރު ދިރިއުޅުއްވަމުން ގެންދެވި ގ. ކެނެރީގެއިން ނިކުމެވަޑައިގެން އެމަނިކުފާނުގެ ކާރުކޮޅަށް އަރާވަޑައިގެންނެވި ވަގުތު ސައިކަލެއްގައި ހަރުކޮށްފައި ހުރި އެއްޗެއް ގޮއްވާލައިގެންނެވެ.
ރައީސް ނަޝީދަށް އަމާޒުކޮށް ދިން ހަމަލާއަށް އަހަރަކަށް ވުރެ ގިނަ ދުވަސްވީއިރު، މިހާރު އެ މައްސަލައިގެ އިބްދިދާއީ މަރުހަލާ ނިމި ޝަރީއަތުގެ މަރުހަލާ ފެށުމަށް ވަނީ ތައްޔާރުވެފަ އެވެ.
މި މައްސަލައިގައި ހައްޔަރު ކުރި މީހުންގެ ތެރެއިން ހުކުމެއް އައިސްފައި ވަނީ ހަމަލާ ދިނުމުގައި އިސްކޮށް އުޅުނު އަދި ކުށަށް އިއުތިރާފުވި އަދުހަމް އަހުމަދު ރަޝީދުގެ މައްޗަށެވެ. އިއުތިރާފުގެ އެއްބަސްވުމެއް އެކުލަވާލާފައި އޮތުމުގެ ސަބަބުން އޭނާގެ މައްޗަށް އައީ 13 އަހަރުގެ ހުކުމެކެވެ.
advertisment