ސިވިލް ކޯޓުގެ ގާޒީ އަލީ އަބްދުﷲ ގެ ސުލޫކީ މައްސަލައެއް ބަލައި، ތަހުގީގު ކުރުމަށް ފަހު އޭނާގެ މައްޗަށް އެކަން ސާބިތުވާކަމަށް ނިންމައި އަދަބެއްގެ ގޮތުގުން ނަސޭހަތް ދީ ތަމްރީނު ޕްރޮގްރާމެއް ފުރިހަމަ ކުރުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
ފަނޑިޔާރުންނާއި ގުޅުން ހުރި މައްސަލަތަކެއް ބަލައި، މަގާމުން ވަކި ކުރުމަށް ޖޭއެސްސީން މިދިޔަ ދެ އަހަރެއްގެ ތެރޭ ގިނަ މައްސަލަތަކެއް މަޖިލީހުގެ ތަޅުމަށް ފޮނުވި އެވެ. އަދި ބައެއް ފަނޑިޔާރުން ޖޭއެސްސީން އެ މައްސަލަތައް ބަލަން ފެށުމުން އިސްތިއުފާ ވެސް ދީފައި ވެއެވެ.
ސިވިލް ކޯޓުގެ ގާޒީއަކަށް ހުންނެވި އަލީ އަބްދުﷲ އާއި ގުޅޭގޮތުން ޖޭއެސްސީން ބަލާފައި ވަނީ، އެ ކޯޓުގެ ގަޒިއްޔާއަކާއި ގުޅިގެން ވަގުތީ ގޮތުން އަމުރަކަށް އެދި ދައުވާ ކުރާ ފަރާތުން ހުށަހެޅުމުން އަޑުއެހުމެއް ބޭއްވުމަށް ފަހު އެ އަމުރާއި މެދު ގޮތެއް ނުނިންމައި ބޭއްވި މައްސަލައިގަ އެވެ. އަދި ވަގުތީ އަމުރާއި މެދު ގޮތެއް ނިންމާފައި ވަނީ، އެފަދަ މައްސަލައެެއް ބަލައި ގޮތް ނިންމަން ޖެހޭ މުއްދަތަށް ވުރެ ގިނަ ދުވަހުންކަމަށް ބެލެވޭތީ އެއީ ފަރުވާކުޑަކުރުންކަމަށް ގަބޫލު ކުރެވޭތީ އެވެ.
އެހެން ކަމުން އެކަމުގެ އަދަބެއްގެ ގޮތުން ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަންގެ) ޤާނޫނު ގެ 1-32 ވަނަ މާއްދާގެ (ހ) ގެ 1 ވަނަ ނަންބަރުގެ ދަށުން، ޢަލީ ޢަބްދުﷲއަށް ނަޞޭޙަތް ދިނުމާ އެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމުގެ ފިޔަވަޅު އެޅުމަށް ފެންނަކަމަށް އެ ކޮމިޝަނުގެ ޖަލްސާގައި ނިންމާފައިވާކަމަށް ކޮމިޝަނުގެ ބަޔާނުގައި ވެއެވެ.