ބީއެމްއެލްއިން ސަންގަށް އިންޒާރު ދިނުން: ”ބޭންކު މީހުންކައިރީ ބުނެބަލަ، މިހިރަ ކޮމެންޓްތައް ކިޔާލަން!“

ރައްޔިތުންގެ އަތުން ގެއްލިގެންދާ ފައިސާތައް ގެއްލުމުގައި ބީއެމްއެލްގެ އެއްވެސް އިހުމާލެއް ނެތްކަމަށް ސިފަކޮށް ބޭންކުން ދައްކަމުންދާ ވާހަކަތަކަށް ރައްޔިތުން ރައްދު ދީފިއެވެ.

ދާދި ފަހުން ސަންގުއެމްވީ އިންވަނީ ރައްޔިތުންގެ އިހުސާސްތައް ހިއްސާކޮށް، ރައްޔިތުންގެ ތެރޭގައި ބޭންކާއިމެދު ދެކެވެމުންދާ ވާހަކަތަކާއި، ކުރެވެމުންދާ ތުހުމަތުތައް ލިޔުމެއްގައި ޝާއިއުކޮށްފައެވެ. ލިޔުން ޝާއިއު ކުރުމާއިއެކު، ބޭންކުންވަނީ ސަންގަށް އިންޒާރުދީ، އެ ލިޔުންތަކުގައިވާ ވާހަކަތައް ދޮގުކޮށް، ލިޔުންތައް ނުނަގައިފިނަމަ، ގާނޫނީ ފިޔަވަޅު އަޅާނެކަމަށްވެސް ބުނެފައެވެ.

ރައްޔިތުންވަނީ އެބައިމީހުންގެ އިހުސާސްތަކާއި ކަންބޮޑުވުންތަކާއި ގުޅޭގޮތުން ބޭންކުން ދައްކާފައިވާ ވާހަކަތަކަށް ރައްދު ދީފައެވެ. ބީއެމްއެލްއިން ނެގުމަށް އަންގާފައިވާ ލިޔުމަށް ހިޔާލު ފާޅުކޮށްފައިވާ ފަރާތްތަކުން ބުނެފައިވާގޮތުން، ބޭންކުން ދޮގު ހަދައި މަކަރު ހަދާކަންވެސް އެ ބޭފުޅުންވަނީ ތަޖުރިބާކޮށްފައެވެ. ބައެއް ބޭފުޅުން އެހެނިހެން ބޭންކުތަކުގެ ހިދުމަތްތައް ހޯދުމަށް އިލްތިމާޒްކޮށްފައިވާއިރު، އަނެއް ބަޔަކު ބުނެފައިވާގޮތުން ”އަހަރެމެންގެ ބޭންކުން އަހަރެމެންގެ އަތުން ކުރަނީ ވައްކަން“ އެވެ.

ސަންގުން ޝާއިއުކޮށްފައިވާ ލިޔުމަށް ހިޔާލު ފާޅުކޮށްފައިވާ ބައެއް ބޭފުޅުން ބުނާގޮތުން ނެގުމަށް އަންގާފައިވާ ލިޔުމުގައި ޝާއިއުކޮށްފައިވާ ވާހަކަތަކަކީ ޝައްކެއްވެސް ނެތް މިންވަރަކަށް އެ ފަރާތަށް އިނގޭ ކަމެކެވެ. އަދި ބައެއް ބޭފުޅުންވަނީ ބީއެމްއެލްގެ ހިދުމަތްތައް ލިބިގަތުން ހުއްޓާލެއްވުމަށް ގަސްތުކުރައްވާކަމަށް ފާހަގަކުރައްވާފައެވެ.

ބޭންކުން ސަންގަށް އިންޒާރު ދިން ކަން ހާމަކޮށް ޝާއިއު ކޮށްފައިވާ ލިޔުމަށް ހިޔާލުފާޅުކޮށްފައިވާ މީހުން ބުނެފައިވާގޮތުން އެހެނިހެން ބޭންކުތަކުން ފައިސާ ގެއްލޭ ވާހަކައެއް ނުދެކެވެއެވެ. އަދި ދެކެވެނީ ބީއެމްއެލް އިން ފައިސާ ގެއްލޭ ވާހަކަ ކަމަށް އިޝާރާތްކޮށް، ބީއެމްއެލްނޫން އެހެން ބޭންކެއްގެ ހިދުމަތްތައް ހޯދުން މުހިންމުކަމަށް ސިފަކުރައްވާފައިވެއެވެ.

ސްކޭމް ކޯލްސް މެދުވެރިކޮށް ފައިސާ ފޭރިގަނެވެނީ، ބޭންކުގެ ތެރެއިން ބަޔަކު މީހުން އެކަމުގައި ޝާމިލުވެ ކަސްޓަމަރުންގެ މައުލޫމާތުތައް ލީކު ކުރުމުންކަމަށްވެސް ހިޔާލު ފާޅުކުރައްވާފައިވާ ބައެއް ބޭފުޅުން ފާހަގަކުރައްވައެވެ. އަދި އިސްލާމިކް ބޭންކްގައިވެސް ބައެއް ފަރާތްތަކުން ފައިސާ ރައްކައުކުރާކަމަށްވީ ނަމަވެސް އެ ބޭންކުގައި ރައްކައު ކުރާ ފައިސާ ނުގެއްލޭކަމަށްވެސް ބައެއް ފަރާތްތަކުން ބުނެފައިވެއެވެ.

ރައްޔިތުންގެ ހިޔާލުތައް ހިއްސާކޮށް ސަންގުން ޝާއިއުކޮށްފައިވާ ލިޔުމާއި ގުޅިގެން އިންޒާރު ދީ އެ ލިޔުންތައް ނެގުމަށް އަންގާފައިވާކަން ޝާއިއުކުރުމާއި ގުޅިގެންވެސް ރައްޔިތުންވަނީ ކަންބޮޑުވުން ފާޅުކޮށްފައެވެ. އެގޮތުން ބައެއް ފަރާތްތަކުން ވަނީ އިންޒާރުތައް ދޭންވީ ބީއެމްއެލް އަށް ކަމާއި މެދު ސުވާލު އުފައްދާފައެވެ.

ހިޔާލު ފާޅުކުރައްވާފައިވާ ބައެއް ބޭފުޅުންވަނީ ބޭންކުން ހިދުމަތް ބަލައިގަތުމުގެ ތެރޭގައި ކުރެވިފައިވާ ތަޖުރިބާ އަދި ފައިސާ ގެއްލިގެން ކުރެވުނު ތަޖުރިބާތައްވެސް ހިއްސާކުރައްވާފައެވެ. އަދި ސަންގުން ޝާއިއުކުރި ލިޔުމަކީ ތެދު ހަގީގަތްކަމަށް ފާހަގަކުރައްވާ ބިރު ދެއްކި ނަމަވެސް ހަގީގަތް ބަދަލު ނުވާނެކަމަށް ފާހަގަކުރައްވާފައެވެ.

ހިޔާޅު ފާޅުކުރައްވާފައިވާ ގިނަ ފާރާތްތަކުންވަނީ ބީއެމްއެލްއަށް އިތުބާރު ނުކުރައްވާކަން ހިއްސާކުރައްވާފައެވެ. އަދި ބޭންކުގައި ބަހައްޓާފައިވާ ފައިސާތައް ގެއްލިގެންދާ ވާހަކަތަކަކީ ހަގީގަތް އޮޅުވާލުން ނޫންކަމަށާއި އެކަން ކުރިމަތިވި އެތައް ބަޔަކު އެ ޝަކުވާ ކޮށްފައިވާކަމަށްވެސް ބައެއް ބޭފުޅުން ބުނެފައިވެއެވެ.

ބައެއް ބޭފުޅުންވަނީ ބޭންކުން އިންޒާރުގެ ސިޓީގައި ސޮއި ކުރި ފަރާތްތަކަށް ލިޔުންތަކަށް ހިޔާލު ފާޅުކުރައްވާފައިވާ ފަރާތްތަކުގެ ކޮމެންޓުތައް ބެއްލެވުމަށްވެސް އިލްތިމާސް ކުރައްވާފައެވެ. އަދި މީހުންގެ ހައްގުތަކާއި ހަވާލުވާ ބައެއްގެ ކިބައިގައި އެ ހައްގުތައް ރައްކައުތެރިކޮށްދިނުމުގެ ގާބިލިއްޔަތު ނެތްނަމަ އަދި ގެއްލިގެންދާ ހައްގުތަކަށް ބޭންކުން ޒިންމާވާން ނުޖެހޭނަމަ، އެކަން ކުރުން ހުއްޓާލުމަށްވެސް ބައެއް ފަރާތްތަކުންވަނީ އިލްތިމާސް ކޮށްފައެވެ.