އެމްޑީޕީ ޕްރައިމެރީގެ މައްސަލަ ކޯޓުން ބަލައިގަނެ، އަޑުއެހުންތައް ފަށަނީ!

ސަރުކާރުގެ މައި ޕާޓީ އެމްޑީޕީގެ ޓިކެޓުގައި ކުރިޔަށް އޮތް ރިޔާސީ އިންތިހާބުގައި ވާދަ ކުރާނެ ކެނޑިޑޭޓެއް ހޮވުމަށް ބޭއްވި ޕްރައިމެރީ ބާތިލުކޮށް ދޭން އެދި ސިވިލް ކޯޓަށް ހުށަހަޅާފައިވާ މައްސަލަ އެ ކޯޓުން ބަލައިގެންފި އެވެ.

މިދިޔަ މަހުގެ 28 ގައި ބޭއްވި އެމްޑީޕީގެ ރިޔާސީ ޕްރައިމެރީގައި، ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދާއި ވާދަ ކުރައްވައި ބޮޑު ތަފާތަކުން އިންތިހާބު ކާމިޔާބު ކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. ވެރިކަމުގެ ދެވަނަ ދައުރަކަށް އައުމަށް، އެމްޑީޕީގެ ތާއީދު ރައީސް ސޯލިހަށް ލިބިފައިވީ ނަމަވެސް ނަތީޖާ ގަބޫލު ކުރުމަށް ރައީސް ނަޝީދު ވަނީ ދެކޮޅު ހައްދަވާފަ އެވެ.

މިދިޔަ ހަފްތާގައި ރައީސް ސޯލިހާއި ޓިކެޓު ހަވާލުކުރިއިރު، ކޯޓަށް ހުށަހެޅި މައްސަލައިގައި އެ ޖަލްސާ ހުއްޓުވައިދޭން ވެސް އެދިފައިވެ އެވެ. މި މައްސަލަ ސިވިލް ކޯޓަށް ހުށަހަޅާފައި ވަނީ ކުރިން އެމްޑީޕީގައި މަގާމުތަކެއް އަދާކުރެއްވި ހާމިދު އަބްދުލްޣަފޫރެވެ. މި ސަރުކާރުން އުފައްދާފައިވާ ޕޮލިސް ބޯޑުގެ މެމްބަރުކަން ވެސް ކުރައްވާ ހާމިދަކީ ރައީސް ނަޝީދު ފެކްޝަނުގެ ބޭފުޅެކެވެ.

މި މައްސަލައިގައި ގާނޫނީ ވަކީލުކަން ކުރައްވާނީ ރައީސް ނަޝީދުގެ ސަރުކާރުގެ ބަންޑާރަ ނައިބުކަން ކުރެއްވި ދިޔާނާ ސައީދެވެ.

Of the three cases we submitted to court on behalf of petitioners who wished to challenge the legality of MDP leadership’s actions in disenfranchising 39,911 members ahead of the party primary, one case has now been registered.

— Dhiyana ?🌹 (@dhiyanasaid) February 20, 2023

ކޯޓުން މައްސަލަ ބަލައިގަނެ، ތާވަލުގައި ވާގޮތުން އަންނަ އަންގާރަ ދުވަހު އަޑުއެހުންތައް ފެށުމަށް ވަނީ ތައްޔާރުވެފަ އެވެ.

އެމްޑީޕީގެ ރިޔާސީ ޕްރައިމެރީގެ މައްސަލަ ކޯޓަށް ހުށަހެޅި ސަބަބެއްކަމަށް، ހާމިދު ވިދާޅުވެފައި ވަނީ ޕާޓީގެ 39،000 މެމްބަރުން ގަވައިދާއި ހިލާފަށް ވަކިކުރުމަށް ފަހު އިންތިހާބު ބާއްވާފައިވާކަމަށް ބުނެ އެވެ.

ރައީސް ނަޝީދު ތުހުމަތު ކުރާގޮތުގައި، އެ މެމްބަރުން ޕާޓީގެ ދަފްތަރުން އުނި ކުރީ ރައޯސް ސޯލިހަށް އިންތިހާބު ކާމިޔާބު ކުރެވޭނެ މަގު ހޯދުމަށެވެ. އަދި ޕާޓީގެ ދަފްތަރުން އުނި ކުރި މެމްބަރުންނަކީ އަސްލު ހަގީގީ، އެމްޑީޕީގެ މެމްބަރުންކަމަށާއި ރައީސް ސޯލިހަށް 2023 ގެ ރިޔާސީ އިންތިހާބު ކާމިޔާބު ކުރެވޭނެ އެއްވެސް މަގެއް ނެތްކަމަށް އެމަނިކުފާނު ވަނީ ވިދާޅުވެފަ އެވެ.