މަޖިލީހުގެ ކުރީގެ ނައިބު ރައީސް އަދި ދިއްގަރު ދާއިރާ މެމްބަރު އަހުމަދު ނާޒިމްގެ މައްޗަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން އޮތް އިތުބާރު ގެއްލުނު ސަބަބު ހާމަކުރަން އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު އިންކާރުކުރައްވައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި، ނާޒިމް ހިލާފުވީ ޕާޓީގެ އަސާސީ ގަވާއިދުގެ ކޮން މާއްދާއަކާތޯ އާއި، އޭނާގެ މައްސަލައެއް ޕާޓީގެ ސުލޫކީ ކޮމިޓީއަށް ހުށަހަޅާފައިވޭތޯ ނޫސްވެރިއަކު ސުވާލު ކުރުމުން އަބްދުއްރަހީމް ވިދާޅުވީ، އެއީ ނާޒިމަށް އޮތް އިތުބާރު ޕާޓީއަށް ގެއްލުމުން ދިމާވި ކަމެއް ކަމަށެވެ. އޭނާ ވިދާޅުވީ އެއީ ޕާޓީގެ ލީޑަޝިޕުން ނިންމާފައިވާ ނިންމުމެއް ކަމަށެވެ.
”ޕާޓީން ނިންމީ އޭނާއަށް އިތުބާރު ނެތް ކަމަށް. އެހެންވެ އެ މައްސަލަ ޕާލިމަންޓަރީ ގްރޫޕަށް ހުށަހެޅީ،“ އަބްދުއްރަހީމް ވިދާޅުވިއެވެ.
ޕާޓީގެ އަސާސީ ގަވާއިދުގެ 36 ވަނަ މާއްދާއާ ހަވާލާދެއްވައި އަބްދުއްރަހީމް ވިދާޅުވީ، ޕާޓީއަށް ގެއްލުންވާ ފަދަ އަމަލެއް މެންބަރަކު ކުރާކަން ލީޑަޝިޕަށް އެނގިއްޖެނަމަ ފިޔަވަޅު އެޅުމުގެ ބާރު ލީޑަޝިޕަށް އޮންނަ ކަމަށެވެ. މީގެ އިތުރުން، ޕީއެންސީގެ ދިއްގަރު ދާއިރާގެ ރައީސްކަމުން ވެސް ނާޒިމް ވަކިކޮށްފައިވާކަން އޭނާ ހާމަކުރެއްވިއެވެ.
”އަޅުގަނޑުމެން ގަބޫލުކުރަނީ އޭނާ އެ މަގާމުގައި ހުރުމަށްވުރެ، ވަކިކުރުމުން ޕާޓީއަށް ލިބޭ ފައިދާ ބޮޑުވާނެކަމަށް،“ އަބްދުއްރަހީމް ވިދާޅުވިއެވެ.
ނަމަވެސް، ނާޒިމް ޕާޓީން ވަކިކުރުމަށް އެއްވެސް ނިންމުމެއް ނިންމާފައި ނުވާކަން އޭނާ ސާފުކޮށްދެއްވިއެވެ. ނާޒިމްގެ އިތުބާރު ގެއްލުނު ސީދާ ސަބަބާ ބެހޭގޮތުން ނޫސްވެރިން ތަކުރާރުކޮށް ސުވާލު ކުރުމުންވެސް، އަބްދުއްރަހީމް އިތުރު ތަފްސީލެއް ދެއްވާފައެއް ނުވެއެވެ.
”އެއީ ލީޑަޝިޕުން ނިންމަންޖެހޭ ކަމެއް. ޕާލިމަންޓަރީ ގްރޫޕުގެ 75 މެންބަރުންގެ ތެރެއިން 73 މެންބަރުންނަށް ނައިބު ރައީސަށް އިތުބާރު ނެތް ކަމަށް ފެންނަނަމަ، އޭގެ ފަހަތުގައި ވަރުގަދަ ސަބަބެއް އޮންނާނެ،“ އޭނާ ވިދާޅުވިއެވެ.
ނާޒިމް މަޖިލީހުގެ ނައިބު ރައީސްކަމުން ވަކިކުރުމަށް ޕީއެންސީގެ ޕާލިމަންޓަރީ ގްރޫޕުން މަސައްކަތް ފެށުމުން، އެކަމާ ގުޅޭ ވޯޓު ނެގުމުގެ ކުރިން ނާޒިމް ވަނީ މަގާމުން އިސްތިއުފާ ދެއްވާފައެވެ. މިއަދު ބޭއްވި ނޫސްވެރިންގެ ބައްދަލުވުމަކީ، ދިއްގަރު ދާއިރާގެ ރައީސްކަމުން ނާޒިމް ވަކިކުރިކަން ޕާޓީން ރަސްމީކޮށް ކަށަވަރުކޮށްދިން ފުރަތަމަ ފަހަރެވެ.
މީގެ ކުރިން ރައީސް ޑރ. މުހައްމަދު މުއިއްޒު ބޭއްވި ނޫސްވެރިންގެ ބައްދަލުވުމެއްގައި އެމަނިކުފާނާ ވެސް އެ ސުވާލު ނޫސްވެރިން އަމާޒުކުރިއެވެ. ރައީސް މުއިއްޒު ވިދާޅުވީ، އެކަމުގެ ޖަވާބު އެމަނިކުފާނަށް ދެއްވޭނީ ޕީއެންސީގެ ޕޯޑިއަމެއްގައި ކަމަށާއި ރައީސުލްޖުމްހޫރިއްޔާގެ ހައިސިއްޔަތުން އެކަމަށް އެއްޗެއް ވިދާޅުނުވެވޭނެ ކަމަށެވެ.
