ރާއްޖެއަށް އަންނަ ބޮޑެތި އިންވެސްޓަރުން ފައްސާލުމަށް ކުރެވޭ މަސައްކަތްތަކުން އިދިކޮޅު ފަރަތްތަކުން ދިވެހި ގައުމާއި މެދު އޮތް އިޚްލާސްތެރި ނިޔަތާމެދު ސުވާލު އުފެދޭކަމަށް ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.
ހީނާ ވަނީ އިދިކޮޅު ފަރާތްތަކުން އިގަލް ހިލްސްއިން ރާސްމާލޭގައި ތަރައްގީކުރާ ”މޯލްޑިވްސް ވޯޓަރފްރަންޓް އެންޑް މެރީނާ“ މަޝްރޫއާއި ގުޅޭ ގޮތުން ދައްކަމުން ގެންދާ ވާހަކަތަކައް ރައްދު ދެއްވާފައެވެ.
އެގޮތުން ސޯޝަލް މީޑިއާގައި ކުރެއްވި ޕޯސްޓެއްގައި ހީނާ ވިދާޅުވީ، ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރާ ސަރުކާރާއި ދޭތެރޭ ފިތުނަ އުފައްދާ އިންވެސްޓަރުންގެ ހިތުގައި ”ލަކުނު“ ޖައްސާ ލައްޖެއްސުމުގެ ނަތީޖާ މީގެ ކުރިންވެސް މިގައުމުން ފެނިގެންދިޔަ ކަމަށެވެ. އަދި ރާއްޖެއަށް އަންނަ ބޮޑެތި އިންވެސްޓަރުން ފައްސާލުމަށް ކުރެވޭ މިފަދަ މަސައްކަތްތަކުން އިދިކޮޅު ފަރަތްތަކުން ދިވެހި ގައުމާއި މެދު އޮތް އިޚްލާސްތެރި ނިޔަތާމެދު ސުވާލު އުފެދޭކަމަށް ހީނާ ވިދާޅުވިއެވެ.
ޔުނައިޓެޑް އެރަބް އެމިރޭޓްސް (ޔޫއޭއީ)ގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާ ގުޅިގެން ރާއްޖޭގައި ކުރިއަށް ގެންދިއުމަށް ހަމަޖެހިފައިވާ ބިޔަ މަޝްރޫއުގެ ދަށުން ރަސްމާލޭގައި ކުރާ އިންވެސްޓްމަންޓުން ދައުލަތަށް ލިބޭނެ ކަމަށް ބެލެވޭ އާމްދަނީއަކީ ރާއްޖޭގެ 179 ރިސޯޓާއި 16 ހޮޓަލާއި 920 ގެސްޓް ހައުސްއާއި 165 ސަފާރީން މިހާރު ލިބޭ އާމްދަނީއަށްވުރެ ބޮޑު އާމްދަނީ ކަމަށް ހީނާ ވިދާޅުވިއެވެ.
މިހާރު ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން ޑޮލަރު ކަމަށް ހީނާ ވިދާޅުވިއެވެ. އަދި ނަފްރަތާ ހަސަދަވެރިކަމުގެ އަނދިރިކަމުގެ ތެރޭގައި ތާއަބަދު ނުތިބެ ވެރިކަމުގެ ދަހިވެތިކަން އެއްފަރާތްކޮށް ގައުމީ ވިސްނުމުގައި ކަންކަމާމެދު ވިސްނާލުމަށް ހީނާ ގޮވާލެއްވިއެވެ.
”ތާއަބަދު ނަފްރަތާ ހަސަދަވެރިކަމުގެ އަނދިރިކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ގައުމީ ވިސްނުމުގައި ކަންކަމާމެދު ވިސްނާކަށް ނުވޭތޯ؟“ ހީނާ
ޔުނައިޓެޑް އެރަބް އެމިރޭޓްސް (ޔޫއޭއީ)ގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާ ގުޅިގެން ރާއްޖޭގައި ކުރިއަށް ގެންދިއުމަށް ހަމަޖެހިފައިވާ ބިޔަ މަޝްރޫއަކީ ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް އެޅިގެންދާ ވަރަށް މުހިންމު ފިޔަވަޅެއް ކަމަށް ސަރުކާރުން ގަބޫލުކުރެއެވެ.
ބޯހިޔާވަހިކަމުގެ އެ މަޝްރޫއު އަންނަ އަހަރުގެ ކުރީކޮޅު ފެށޭނެ ކަމަށް ސަރުކާރުން ބުނެފައިވާއިރު ރަސްމާލެ ތަރައްގީކުރުމަށްޓަކައި ދިވެހި ސަރުކާރާއި އީގަލް ހިލްސް ކުންފުންޏާ ދެމެދު ވަނީ 20 ބިލިއަން ޑޮލަރުގެ ބޮޑު މަޝްރޫއެއްގެ ލެޓަރ އޮފް އިންޓެންޓް ނުވަތަ ކޮމާޝަލް ޓާމްސް އެއްބަސްވުމެއްގައި ސޮއިކޮށްފައެވެ.
އެ ބޮޑު މަޝްރޫއުގެ ދަށުން ރާއްޖޭގެ އުމްރާނީ ތަރައްގީއަށް އިންގިލާބީ ބަދަލުތަކެއް އަންނާނެ ކަމަށް ސަރުކާރުން ބުނެއެވެ. ރަސްމާލޭގެ މަޝްރޫއުގެ އިތުރުން، އެ އެއްބަސްވުމުގެ ދަށުން ހުޅުމާލޭގައި 500 މިލިއަން ޑޮލަރުގެ 5،000 ހައުސިންގ ޔުނިޓް އެޅުމަށް ވަނީ ކަނޑައެޅިފައެވެ.
