ލާމަރުކަޒީ ނިޒާމު ދަންނަ އަދި ފައިސާ މެނޭޖުކުރަން އަދި ރަށްރަށަށް ދޫކޮށްލަން ހަމަ އެކަނި އެނގޭ ޕާޓީއަކީ ދިވެހި ރައްޔިތުންގެ ޕާޓީ, އެމްޑީޕީކަމަށް އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމްޑީޕީގެ 5 ވަނަ ކޮންގްރެސް ނިންމާލުމުގެ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ, ރާއްޖޭގެ ރައްޔިތުން އެދޭ ބަދަލު ގުޅިފައިވަނީ ލާމަރުކަޒީ ރަށްވެހި ތަރައްޤީއާ ކަމަށާއި އެ ނިޒާމު ބާރުވެރިކުރަން ދަންނަ ހަމަ އެކަނި ޕާޓީއަކީ އެމްޑީޕީ ކަމަށެވެ.
ފައިސާ މެނޭޖުކުރަން، އަދި ރަށްރަށަށް ދޫކުރަން އެނގޭ ޕާޓީއަކީ އެމްޑީޕީކަމަށާއި އަދި ރާއްޖޭގެ އިޤްތިސޯދަކީ މުޅި މާލެ އެކަނި ތަރައްގީކުރުން ކަމަށް ދެކިގެން ދިވެހިރާއްޖެ ތަރައްޤީއެއް ނުކުރެވޭނެކަމަށާއި އަތޮޅު ތެރޭގައިވެސް އުޅެނީ ދިވެހި ރައްޔިތުންކަން ދެނެގަނެ އެރަށްތަކުގެ ރައްޔިތުންގެ ވަށައިގެންވާ އަތޮޅުތަކާއި ރަށްރަށާއި ގުޅި ލާމެހިފައިވާ އިޤްތިސާދެއް އޮންނަން ޖެހޭކަން ޤަބޫލުކުރާ ބަޔަކަށް ނޫނީ ރާއްޖޭގެ ތަރައްގީކުރިއަކަށް ނުގެންދެވޭނެކަމަށް އޭނާ ވިދާޅުވިއެވެ.
”ރާއްޖޭގެ ރައްޔިތުން އެދޭ ބަދަލު ގުޅިފައިވަނީ ލާމަރުކަޒީ ރަށްވެހި ތަރައްގީއަށް. އެނިޒާމު އެމްޕަވާކުރަން ދަންނަ ހަމައެކަނި ޕާޓީއަކީ އަޅުގަނޑުމެންގެ މި ފަހުރުވެރި ދިވެހި ރައްޔިތުންގެ ޑިމޮކްރެޓިކް ޕާޓީ“ ޝާހިދު
ހަމަ އެހެންމެ ޝާހިދު ވަނީ ކައުންސިލުތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މުސާރައާއި އިނާޔަތްތައް ބޮޑުކޮށް ކައުންސިލުތަކަށް ޚަރަދުކުރުމަށާއި އަދި ލާމަރުކަޒީ މުއައްސަސާތައް ވަރުގަދަކުރުމަށް ސަރުކާރަށް ގޮވާލައްވާފައެވެ.
ސިޔާސީ ވެރިން އައިސް ދާނެކަމަށާއި އެހެންނަމަވެސް އޮންނާނީ ރަށާއި އަތޮޅާއި ސިޓީކަމަށާއި އެހެންކަމުން ލާމަރުކަޒީ ހިންގުން ދަމަހައްޓާ ވަރުގަދަ ކުރަންޖެހޭކަމަށް ޝާހިދު ވިދާޅުވިއެވެ.
ދިވެހި ރާއްޖޭގެ ހަގީގީ ތަރައްގީ ގުޅިފައިވަނީ ހެޔޮ ބަދަލަށް ކަމަށާއި ރަގަޅު ހެޔޮ ބަދަލެއް ގެނެވޭނީ ހެޔޮ މަޝްވަރާތަކަކުން ކަމަށް އޭނާ ވިދާޅުވިއެވެ. އެގޮތުން އެމްޑީޕީން މިއަދުވެސް ސާބިތުކޮށްދެމުންދަނީ 21 އަހަރުގެ ދުރު ވިސްނޭ ހެޔޮ ވިސްނޭ ސިޔާސީ މުއައްސަސާއެއްކަމަށް އޭނާ ވިދާޅުވިއެވެ.
ޤާނޫނުއަސާސީ ފާސްކުރިފަހުން 18 އަހަރު ވީއިރު މިހާރު އަނެއްކާވެސް މިއޮތީ ރައްޔިތުންނަށް ފައިދާވާނެ ދުރު ވިސްނޭ ހެޔޮ ބަދަލުތަކެއް ގެންނަންޖެހޭ ހާލަތެއްގައި ކަމަށް ޝާހިދު ވިދާޅުވިއެވެ. އެގޮތުން އެ ބޮޑު ހެޔޮ ބަދަލު ގެނައުމަށްޓަކައި ޤާނޫނު އަސާސީއަށް ގެންނަންޖެހޭ އިސްލާހީ ބަދަލުތައް ގެނައުމަށް އެމްޑީޕީގެ ކޮންގްރެސްއިން ނިންމުމުން ދޭހަވެގެންދަނީ ޕާޓީގެ ހަރުދަނާ ކަމާއި ދިވެހި ރައްޔިތުންނަށް ސާބިތުވާކަމުގެ ލާމަސީލު މިސާލު ކަމުގައި ޝާހިދު ވިދާޅުވިއެވެ.
