ކޮވިޑް-19އާ ގުޅިގެން އައްޑޫ ސިޓީ ކައުންސިލުން ދެމުންގެންދާ ހިދުމަތްތައް ވަގުތީ ގޮތުން މެދުކަނޑާލައިފިއެވެ.
އައްޑޫ ކައުންސިލުން ނެރުނު އިއުލާނެއްގައި ބުނީ ކޮވިޑާ ގުޅިގެން އައްޑޫ ސިޓީ މޮނިޓަރިންގ އަށް ލާފައިވާތީ އާއި މިވަގުތު އައްޑޫގައި ކޮމިއުނިޓީ ސްޕްރެޑެއް އޮތުމުގެ ސަބަބުން ރައްޔިތުންގެ ސަލާމަތާއި ރައްކާތެރިކަމަށްޓަކައި ކައުންސިލްގެ އިދާރާއާއި އެ އިދާރާގެ ދަށުން ހިނގަމުންދާ އަވަށު އޮފީސްތަކުން ދެމުންގެންދާ އެންމެހާ ހިދުމަތްތައް ދިނުންް ވަގުތީ ގޮތުން މެދުކަނޑާލުމަށް ނިންމާފައިވާ ކަމަށެވެ.
މި ހިދުމަތްތައް މެދުކަނޑާލަން ނިންމާފައިވަނީ އައްޑޫ ސިޓީ ކައުންސިލުން ވަކިގޮތެއް އަންގަންދެންނެވެ.
އެހެންނަމަވެސް ކައުންސިލްގެ އިދާރާއިން ދެމުންގެންދާ ހިދުމަތްތައް ދިނުން މެދުކަނޑާލި ނަމަވެސް އައްޑޫ އިމަޖެންސީ އޮޕަރޭޝަން ސެންޓަރާއި ސޯޝަލް ސަޕޯޓް ޑެސްކްތަކުން ދެމުންގެންދާ ހިދުމަތްތައް މެދުކެނޑުމެއް ނެތި ލިބޭނެ ކަމަށް ކައުންސިލުން ވަނީ ބުނެފައެވެ.
އައްޑޫގައި މިވަގުތުހުރި އެކްޓިވް ކޭސްތަކުގެ އަދަދު ވަނީ 163 އަށް އަރާފައެވެ. މި ބަލިން 38 މީހަކު ރަނގަޅުވެފައިވާއިރު ހަ މީހަކަށް އަންނަނީ ކޮވިޑް ފެސިލިޓީގައި ފަރުވާ ދެމުންނެވެ.
