ރައީސް އިބްރާޙިމް މުހައްމަދު ސާލިހުގެ ކެމްޕެއިން ހަރަކާތަށް ތައްޔާރުކޮށްފައިވާ މަޑަވެލީގެ އެމްޑީޕީގެ ޖަގަހައިގައި ހުޅުޖަހާ ރޯކޮށްލި މައްސަލަ ޑިމޮކްރެޓްސްގައި ހުންނަވާ މަޖިލީހުގެ ރައީސް މުހައްމަދު ނަޝީދު ކުށްވެރިކުރައްވައިފިއެވެ.
ރައީސް ސާލިހު ކުރައްވަމުންދާ ކެމްޕެއިން ދަތުރުފުޅުތަކުގައި އެމަނިކުފާނުގެ ޓީމުންވަނީ ގދ އަތޮޅުގައި ޒިޔާރަތްކުރައްވާ ފުރަތަމަ މަންޒިލެއްގެ ގޮތުގައި މަޑަވެލި ކަނޑައަޅާފައެވެ. މި ވަގުތު ދ އަތޮޅުގައި ހުންނެވިއިރު، އެމަނިކުފާނު ވަޑައިގަތުމުގެ ގޮތުން މަޑަވެލީގެ ކެމްޕެއިން ޓީމުންވަނީ އެ ރަށުގައި ހުންނަ އެމްޑީޕީގެ ޖަގަހަ ތައްޔާރީ ހާލަތަށް ގެނެސްފައެވެ. އެ ޖަހަގައިގައި އަލިފާނުގެ ހާދިސާއެއް ހިނގިކަން ސޯޝަލްމީޑިއާގައި ޝާއިއުކުރެވިގެންދިޔައީ ފަތިހުގެ ވަގުތެއްގައެވެ. އެ ތަނުގައި އެވަގުތު ގިނަ އަދަދެއްގެ މުދާ ހުރިއެވެ. އެގޮތުން ގޮނޑި އަދި ބެނާރ ފަދަ ތަކެއްޗާއި ޕޯޑިއަމްއެއްވެސް ހުރި އިރު އަލިފާނުގެ ސަބަބުން އެތަކެއްޗަށްވަނީ ގެއްލުންތައް ލިބިފައެވެ.
Inthikhaab aai gulhuvaa meehun hayyarukoh adhi thanthan roakoh mudhalah gellundhee hadhaigen nuvaane. Madaveli MDP jagaha gai hulhujehun kuvverikuran.
— Mohamed Nasheed (@MohamedNasheed) August 8, 2023
މަޑަވެލި އެމްޑީޕީ ޖަގަހަށް ލިބުނު ގެއްލުންތަކާއިމެދު ރައީސް ނަޝީދު ކަންބޮޑުވުން ފާޅުކުރައްވާފައިވާއިރު، އެމްޑީޕީގައި އިސްކޮށް ހުންނަވާ ޑިފެންސް މިނިސްޓަރ މާރިޔާ ދީދީ ފަދަ ބޭފުޅުންވެސް ވަނީ އެ ހާދިސާއާއި ގުޅިގެން ވާހަކަދައްކަވާފައެވެ. އެކަމަނާ ވިދާޅުވީ، ރައީސް ސާލިހާއި ރަނިންގް މޭޓު އަސްލަމްގެ މަޑަވެލި ޖަގަހައިގައި ހުޅުޖެހުމަކީ ހަރުކަށި އިބާރާތުން ކުށްވެރިކުރާކަމެއްކަމަށެވެ. މާރިޔާ ވިދާޅުވީ، އެ މައްސަލަ ތަހުގީގު ކުރުމަށް ފުލުހުންގެ މުއައްސަސާއަށް ގޮވާލާކަމަށާއި އެންމެހާ ޕާޓީތަކުންވެސް އަނިޔާވެރި އަމަލުތަކާއި ދުރުހެލިވުމަށް ގޮވާލާކަމަށެވެ. މިނިސްޓަރު ވިދާޅުވީ، ގާނޫނުއަސާސީގައި ވާގޮތުގެ މަތިން ޑިމޮކްރެޓިކް އުސޫލުގެ ދަށުން ކަންކަން ކުރިއަށް ދިއުމަށް ޖާގަ ދޭންޖެހޭކަމަށެވެ.
