ރައީސް ޔާމީން ޖުރިމަނާގެ ގޮތުގައި ދައްކަންޖެހޭ 5 މިލިއަން ޑޮލަރު ދެއްކުން ފަސްކުރުމުގެ އަމުރެއް ނެރެފި

ކުރީގެ ރައީސް އަބްދުﷲ ޔާމީން އަބްދުލްގައްޔޫމް މައްޗަށް ކޮށްފައިވާ ޖޫރިމަނާ ފައިސާ ދެއްކުން ފަސްކުރުމުގެ އަމުރެއް ހައި ކޯޓުން ނެރެފިއެވެ.

އެމަނިކުފާނު ވަނީ މަނީ ލޯންޑާ ކުރުމާއި، ރިޝްވަތު ގަބޫލުކުރުމުގެ ކުށުގެ ދައުވާގައި 5 މިލިއަން ޑޮލަރުން ޖުރިމަނާކޮށްފައެވެ. ރައީސް ޔާމީންއަށް ރިޔާސީ އިންތިހާބުގައި ޥާދަކުރުމުގެ ހައްގު ގެއްލުނު ސަބަބުތަކުގެ ތެރޭގައި މި ދަރަނި ނުދައްކާ އޮތުން ހިމެނުނުއިރު، ރައީސް ޔާމީން ވިދާޅުވީ ދަރަނި ދައްކަންޖެހޭ ވަކި ތަރާީހެއް ދީފައިނުވާކަމަށެވެ.

އެމަނިކުފާނު ވަނީ ޖޫރިމަނާކުރުމަށް ނިންމާފައިވާ ނިންމުން ތަންފިޒުކުރުން ފަސްކުރުމުގެ އަމުރަކަށް ހައި ކޯޓުގައި އެދިފައެވެ. މިކަމާއި ގުޅިގެން ރައީސް ޔާމީން ގެ ފަރާތުން ކޯޓަށް ހުށައެޅި ސަބަބުތަކާއި، މައްސަލައާއި އެއްގޮތަށް މި އަމުރު ނެރެދިނުމަށް ހައި ކޯޓުން ވަނީ ނިންމާފައެވެ.

އެމަނިކުފާނުގެ މައްޗަށް ކޮށްފައިވާ ހުކުމް ރައީސް ޔާމީންގެ ފަރާތުން އިސްތިއުނާފުކޮށްފައިވާއިރު، ޝަރީއަތް ހިންގައި ގޮތެއް ކަނޑައަޅައިފިނަމަ، ހައިކޯޓުން ބަލަމުންދާ މި މައްސަލައިގައި އިންސާފު ގާއިމްކުރުމަށް ހުރަސް އެޅިދާނެކަމަށް ފެންނަކަމަށް ހައި ކޯޓުން ނެރުނު އަމުރުގައި ބުނެފައިވެއެވެ. އެހެންކަމުން ގޮތެއް ކަނޑައަޅަންދެން ނުވަތަ، މި ނޫން ގޮތަކަށް އެ ކޯޓުން އަންގަންދެންޖޫރިމަނާ ދެއްކުން ފަސްކުރުމަށް ހައިކޯޓުން ވަނީ އަމުރުކޮށްފައެވެ.

މީގެ އިތުރުން ރައީސް ޔާމީން ވަނީ އެމަނިކުފާނަށް އިއްވާފައިވާ 11 އަހަރުގެ ޖަލު ހުކުމް ތަންފީޒުކުުރުން ފަސްކޮށްދިނުމުގެ އަމުރަކަށްވެސް އެދިފައެވެ. ނަމަވެސް މި އަމަރު ކޯޓުން ނެރެދީފައެއް ނުވެއެވެ.