އައްޑޫ ބިން ހިއްކުމުގެ މަޝްރޫޢުގެ ފިޔަވައްސެއް ނިންމާލައިފި!

އައްޑޫ ސިޓީ ބިން ހިއްކުމުގެ ފިޔަވައްސެއް ކާމިޔާބުކަމާއިއެކު ނިންމާލާފައިވާކަން ޕްލޭނިންގް މިނިސްޓްރީއިން ހާމަކޮށްފިއެވެ.

މިނިސްޓްރީއިން ހާމަކޮށްފައިވާގޮތުން، އައްޑޫ މަރަދޫ އަދި މަރަދޫ ފޭދޫގައި 76 ހެކްޓަރު އަދި ހިތަދޫގައި 80 ހެކްޓަރު ހިއްކާފައިވެއެވެ.

އައްޑޫ ޑިވެލޮޕްމަންޓް ޕްރޮޖެކްޓުގެ ދަށުން އައްޑޫ ސިޓީގެ ބިން ހިއްކުމުގެ ފޭސް ވަނީ ކާމިޔާބު ކަމާއެކު އޮގަސްޓު މަހުގައި ނިމިފައެވެ. އެގޮތުން، އައްޑޫ ސިޓީ މަރަދޫ އަދި މަރަދޫ ފޭދޫގައި 76 ހެކްޓަރު އަދި ހިތަދޫގައި 80 ހެކްޓަރު ވަނީ ހިއްކާފައެވެ. pic.twitter.com/UhKZqsYOJv

— Min.of National Planning, Housing & Infrastructure (@MoNPHImv) September 4, 2023

ޕްލޭނިނިގް މިނިސްޓްރީއިން ބުނެފައިވާގޮތުން، ރިސޯޓު އައިލެންޑުގެ ގޮތުގައި ތަރައްގީކުރާ 3 ރަށަށް ޖުމަލަ 25 ހެކްޓަރު ބިން އަދި ހަންކެޑަގައި 4.72 ހެކްޓަރުވެސް ހިއްކާ ނިމިފައިވެއެވެ. އަދި މި މަޝްރޫޢުގެ ދަށުން މިހާރު ކުރިއަށް ދަނީ ހިއްކާފައިވާ ސަރަހައްދުތަކުގެ ގޮނޑުދޮށް ހިމާޔަތްކުރުމުގެ މަސައްކަތްކަމަށްވެސް ބުނެފައިވެއެވެ.

މަސައްކަތްތައް ބާރު ދުވެއްޔެއްގައި ކުރިއަށް ދާކަމަށް ޕްލޭނިންގް އިން ހާމަކޮށްފައިވާއިރު، މި މަސައްކަތްތައް ކުރެވިގެންދާނީ އީއައިއޭ ހަދައި ތިމާވެއްޓަށް އެންމެ އަސަރު ކުޑަ ގޮތަކަށްކަމަށް ރައީސް ވަނީ ވިދާޅުވެފައެވެ. އައްޑޫ ބިން ހިއްކުމުގެ މަޝްރޫއުއަކީ އައްޑޫގެ ކައުންސިލުން ރައީސް ސާލިހަށް އަރުވާފައިވާ ވައުދުނާމާގެ ދަށުން ކުރެވެމުންދާ މަސައްކަތެކެވެ.