މަރަދޫ ދާއިރާގެ މެމްބަރު އިބްރާހިމް ޝަރީފަށް ހަމަލާ ދިނުމުގެ ތުހުމަތުގައި 4 މީހަކު ހައްޔަރު ކޮށްފިއެވެ.
ރިޔާސީ އިންތިހާބުގެ ދެ ވަނަ ބުރުގެ ޥޯޓުލުން ކުރިއަށް ދަނިކޮށް ރައްޔިތުންގެ މަޖިލީހުގެ އެމްޑީޕީގެ ދެ މެމްބަރަކަށް ވަނީ ހަމަލާދީފައެވެ. އެގޮތުން މަރަދޫ ދާއިރާގެ މެމްބަރު އިބްރާހިމް ޝަރީފަށް ބަޔަކު ދިން ހަމަލާގައި މޫނު މައްޗަށް ވަނީ ވަރަށް ބޮޑަށް އަނިޔާވެފައެވެ.
ފުލުހުން ބުނީ އެ މައްސަލައިގައި ހައްޔަރުކޮށްފައިވަނީ އުމުރުން 27 އަހަރުގެ ދިވެހި ފިރިހެނަކާއި، 24 އަހަރުގެ ތިން ފިރިހެނެއް ކަމަށެވެ.
މި މީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން 27 އަހަރު މީހާއި 24 އަހަރުގެ ދެ މީހެއްގެ ބަންދަށް ދެ މަސް ދުވަސް ޖަހާފައިވާ ކަމަށް ބުނެފައިވެއެވެ. އަދި 24 އަހަރުގެ އެއްކެއްގެ ބަންދުގެ މުއްދަތަށް ޖަހާފައިވަނީ އެއްމަސް ދުވަހަށް ކަމަށްވެސް ބުނެއެވެ. މި މައްސަލަ ދިވެހި ފުލުހުންގެ ހިދުމަތުން ބަލަމުން ގެންދާކަމަށްވެސް ބުނެފައިވެއެވެ.
އަދި ހަމަ އެ ދުވަހު ފޭދޫ ދާއިރާގެ މެމްބަރު މުހައްމަދު ނިހާދަށްވެސް ހަމާލާދީފައި ވެއެވެ.
މަރަދޫ ދާއިރާގެ މެމްބަރު ޝަރީފް އަށް ހަމަލާދީފައިވަނީ މެންހަޓަން ހޮޓަލުގައި އިންތިހާބާ ގުޅޭގޮތުން މަސައްކަތް ކުރައްވަމުން ގެންދަވަނިކޮށް ކަމަށް ޝަރީފުގެ ފަރާތުން ވަނީ މައުލޫމާތު ލިބިފައެވެ.
advertisment