ރަޖިސްޓްރީ ނުކޮށް ޚަބަރުފެތުރުމަށް ހިންގާ ވެބްސައިޓުތަކަކީ ވެސް “މީޑިއާ” ކަމަށް ބަލާތީ އެ ފަރާތްތަކުން ފަތުރާ ޚާބަރާއި މަޢޫލޫމާތުތައް މޮނިޓަރ ކުރުމާއި ޒިންމާދާރުކުރުމަކީ މޯލްޑިވްސް މީޑިއާ ކައުންސިލްގެ މެންޑޭޑްޓްގެ ތެރޭގައި ހިމެނޭކަމެއްކަމަށް އެ ކައުންސިލްއިން ބުނެފިއެވެ.
މީޑީއާ ކައުންސިލްއިން ހާމަކޮށްފައިވާ ގޮތުގައި އެ ކައުންސިލްގެ ޤާނޫނުގެ 36 ވަނަ މާއްދާގައި މަޢުލޫމާތާއި ހިޔާލާއި ޚަބަރު ފެތުރުމަށްޓަކައި ދިވެހިރާއްޖޭގައި ރަޖިސްޓްރީކޮށްގެންނާއި ނުކޮށް ހިންގާ ވެބްސައިޓްތައްވެސް ބަލަނީ މީޑީއާގެ ގޮތުގައި ކަމަށް ބުނެފައިވެއެވެ. އެހެންކަމުން އެފަދަ ވެބްސައިޓުތަކާއި ގުޅިގެން އާންމުންގެ ފަރާތުން ގިނަ ޝަކުވާތަކެއް ލިބެމުންދާކަން އެ ކައުންސިލްއިން ވަނީ ފާހަގަކޮށްފައެވެ.
އެމްއެމްސީން ބުނީ، މީޑިއާގެ ނަމުގައި ހަގީގަތާ ހިލާފު މައުލޫމާތުތައް ފަތުރަމުން އަންނަ އިރު އެއްވެސް ފިޔަވަޅެއް ނޭޅި އޮތުމަކީ ކަންބޮޑުވުމެއް ކަމެއް ކަމަށާއި ނަމަވެސް ކުރިޔަށް އޮތް ދުވަސްތަކުގައި މީޑިއާތަކާއި ކަމާގުޅޭ ޖަމިއްޔާތަކާއި ދައުލަތުގެ އިދާރާތަކާއި މުއައްސަސާތައް އަދި އާންމުންގެ ހިޔާލާ އެކު އެ މަސައްކަތް ވަރަށް އަވަހަށް ކުރާނެ ކަމަށް ބުނެފައިވެއެވެ.