ހުޅުމާލެ ތިންވަނަ ފިޔަވަހި މަޝްރޫއުގެ ދަށުން ހިއްކަމުން ދާ ސަރަހައްދުގައި އަޅާފައި ހުރި އުޅަނދުތައް ނެގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފި އެވެ.
އެ ކޯޕަރޭޝަނުން މިއަދު އާންމު ކުރި އިއުލާނެއްގައި ވަނީ ހުޅުމާލެ ތިން ވަނަ ފިޔަވަހީގެ ގޮތުގައި ހިއްކާ ސަރަހައްދުގެ ސައިޓްގެ މަސައްކަތަށް ދަތިވާ ގޮތަށް އަޅާފައިވާ އުޅަނދުތައް ނެގުމަށް އެދޭ ކަމަށެވެ. އަދި އެޗްޑީސީގެ ޗާޓާ އެއްގޮތަށް އެ ސަރަހައްދުގައި އަޅާފައިވާ އުޅަނދުތައް ނެގުމަށް ވެސް އަންގާކަމަށް އެ އިއުލާނުގައި ވެއެވެ.
އެ އެންގުމުގައި ވަނީ ޗާޓެއް އާންމު ކުރުމަށް ފަހު، ޗާޓުގައި ދައްކާފައިވާ ސައިޓް ބީ އުޅަނދުތައް ބުރާސްފަތި ދުވަހުގެ ރޭ 12:00 ގެ ކުރިން ނެގުމަށެވެ.
އެޗްޑީސީން ބުނީ އެ މަޝްރޫއުގެ ސަބަބުން ނަގާ އުޅަނދުތައް އެ ސަރަހައްދުން ބޭރުގައި އެޅުމުގެ ފުރުސަތު އެ ކޯޕަރޭޝަނުން ފަހިކޮށްދޭނެ ކަމަށެވެ.