ރިޔާސީ ނިޒާމެއްގައި ރައީސުލްޖުމުހޫރިއްޔާ ކީ ނަމަވެސް ފަސް އަހަރަށް ރަސްކަލެއް އައްޔަނުކުރުމާއި އެއްފަދަ ކަމަށް މާލެ ސިޓީ ކައުންސިލުގެ ގަލޮޅު އުތުރު ދާއިރާގެ ކައުންސިލު މެމްބަރު ސައިފް ފާތިހު ވިދާޅުވެއްޖެއެވެ.
ސަރުކާރުގެ ސިޔާސީ މަގާމުތަކުގެ އަދަދުތައް އިންތިހާއަށް މައްޗަށް ގޮސްފައިވާކަމުގެ ކަންބޮޑުވުން އެކި ފަރާތްތަކުން ފާޅުކުރަމުންދާއިރު ސައިފްވަނީ އަމިއްލަ އެކްސް އެކައުންޓުން ކުރެއްވި ޕޯސްޓެއްގައި މި މައްސަލައަށް އަލިއަޅުއްވާފައެވެ.
އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދުގެ އާއިލާ ބޭފުޅަކު ޓުއަރިޒަމް މިނިސްޓްރީގެ ނައިބެއްގެ މަގާމަށް އައްޔަނުކޮށްފައިވާކަމަށް ބުނެ އިދިކޮޅު ފަރާތްތަކުން ދައްކަމުންދާ ވާހަކަތަކަށް އިޝާާރާތްކުރައްވާ ސައިފް ވިދާޅުވީ، ރައީސް އެދިވަޑައިގެންނެވި މީހަކަށް އެމަނިކުފާނު އެދިވަޑައިގެންނެވި މިންވަރަކަށް އަދި ފެންވަރެއްގައި މުސާރައާއި އިނާޔަތްތަކުގައި ސިޔާސީ ގޮތުން މީހުން އައްޔަނުކުރެވޭކަމަށެވެ.
އެހެންނަމަވެސް ކެބިނެޓުގައި ތިއްބަވާ މީހުން ނޫން އެހެނިހެން މަގާމުތަކުގައި ތިބި މީހުން ޖަވާބުދާރީ ވާންޖެހެނީ ހަމައެކަނި ރައީސް ޑރ މުއިއްޒުއަށް ކަމަށްވެސް ވިދާޅުވިއެވެ. ސައިފް ވިދާޅުވީ، އިތުރު ބަޔަކަށް އެ މީހުން ވަޒީފާއިން ވަކި ކުރެވޭނެ ގޮތެއްވެސް ނޯންނަކަމަށެވެ. އަދި ރިޔާސީ ނިޒާޟުގައި ފަސް އަހަރަށް ރައީސްއަކު ހޮވިނަމަވެް ހޮވެނީ ރަސްކަލެއްކަމަށް ވިދާޅުވިއެވެ.
