ދިވެހިރާއްޖޭގެ މާލީ ދާއިރާ ހަރުދަނާކޮށް ޒަމާނީ ކުރުމަށް ފާހަގަކޮށްލެވޭ މަސައްކަތްތަކެއް ކޮށްފައިވާ މުއައްސަސާތަކުގެ އަގު ވަޒަންކޮށް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކް އޮފް މޯލްޑިވްސް (ބީއެމްއެލް)، މޯލްޑިވްސް އިސްލާމިކް ބޭންކް (އެމްއައިބީ) އަދި އެލައިޑް އިންޝުއަރެންސް ކޮމްޕެނީއަށް އެވޯޑް ދީފިއެވެ.
މި އެވޯޑްތައް ހަވާލުކޮށްފައިވަނީ އަލަށް ތައާރަފުކުރި ”މޯލްޑިވްސް ފައިނޭންޝަލް ސެކްޓަރ އެވޯޑްސް“ ގައެވެ.
އެމްއެމްއޭގެ 45 ވަނަ އަހަރީ ދުވަހުގެ މުނާސަބަތުގައި ތައާރަފުކުރި މި އެވޯޑަކީ، ރާއްޖޭގެ މާލީ ދާއިރާ ތަރައްޤީކޮށް، އައު އީޖާދުތައް ތައާރަފުކުރުމާއި، ދާއިރާ ޒަމާނީ ކުރުމަށް މުހިންމު ޚިދުމަތްތަކެއް ކޮށްދީފައިވާ މުއައްސަސާތަކާއި ފަރުދުންގެ އަގު ވަޒަންކުރުމުގެ މަޤްޞަދުގައި ދޭން ފެށި އެވޯޑެކެވެ.
ޑިޖިޓަލް ޓެކްނޮލޮޖީ އާއި އައު އީޖާދުތަކުގެ އެހީގައި ބޭންކިންގ ޚިދުމަތްތަކަށް އިންގިލާބީ ބަދަލުތަކެއް ގެނައުމަށް ކުރަމުންދާ މަސައްކަތުގެ އަގު ވަޒަންކޮށް، ބީއެމްއެލްއަށް ވަނީ ”އެކްސެލެންސް އިން ޑިޖިޓަލް ފައިނޭންސް އެންޑް އިނޮވޭޝަން“ އެވޯޑް ލިބިފައެވެ.
އެމްއެމްއޭއިން ހާމަކުރާ ގޮތުގައި، މި އެވޯޑަކީ އައު ޑިޖިޓަލް މާލީ ހައްލުތައް ތައާރަފުކޮށް، ކަސްޓަމަރުންގެ ތަޖުރިބާ ރަނގަޅުކުރުމާއި، ޚިދުމަތުގެ ހަލުވިކަން އިތުރުކުރުމުގެ އިތުރުން، މާލީ ޚިދުމަތްތައް ފުޅާކޮށް މާލީ ބާޒާރު ކުރިއެރުވުމަށް މަސައްކަތްކުރާ މުއައްސަސާތަކަށް ދެވޭ އެވޯޑެކެވެ.
އެވޯޑް ޕެނަލުން ފާހަގަކުރި ގޮތުގައި، ބީއެމްއެލްއިން ވަނީ ޑިޖިޓަލް ބޭންކިންގއަށް ބޭނުންވާ ވަޞީލަތްތައް ޤާއިމުކުރުމަށް ބޮޑެތި އިންވެސްޓްމަންޓްތަކެއް ކޮށް، މުޅި ރާއްޖެއަށް ޑިޖިޓަލް ޚިދުމަތްތައް ފުޅާކުރުމުގައި އިސް ދައުރެއް އަދާކޮށްފައެވެ. އަދި އެ ބޭންކުން ތަރައްޤީކުރަމުންދާ ޑިޖިޓަލް ޕްލެޓްފޯމްތަކާއި ޓެކްނޮލޮޖީއަށް ބިނާކޮށްދޭ މާލީ ހައްލުތަކުގެ ސަބަބުން، ކަސްޓަމަރުން ބޭންކިންގ ޚިދުމަތް ހޯދާ ގޮތަށް ބޮޑެތި ބަދަލުތަކެއް އައިސްފައިވާކަން ޕެނަލުން ފާހަގަކުރިއެވެ.
ވޭތުވެދިޔަ ދިހަވަރަކަށް އަހަރުގެ ތެރޭގައި ޑިޖިޓަލް ބޭންކިންގ އަކީ ރާއްޖޭގެ މާލީ ނިޒާމުގެ މުހިންމު ބަޔަކަށް ވަނީ ވެފައެވެ. މޯބައިލް ބޭންކިންގ އެޕްލިކޭޝަންތަކާއި، އިންޓަރނެޓް ބޭންކިންގ، ސެލްފް ސާވިސް ބޭންކިންގ އަދި ޑިޖިޓަލް ޕޭމަންޓް ހައްލުތަކުގެ ސަބަބުން ކަސްޓަމަރުންނަށް ބޭންކުގެ ބްރާންޗްތަކަށް ނުގޮސް ދުރުގައި ތިބެގެން މާލީ މުއާމަލާތްތައް ހިންގުމުގެ ފުރުސަތު ވަނީ ފަހިވެފައެވެ.
އެމްއެމްއޭއިން އިތުރަށް ފާހަގަކުރި ގޮތުގައި، ރާއްޖެ ފަދަ ޖަޒީރާ ޤައުމެއްގައި، ޑިޖިޓަލް މާލީ ޚިދުމަތްތަކަކީ ވަރަށް މުހިންމު ދައުރެއް އަދާކުރާ އެއްޗެކެވެ. ރަށްތައް ވަކިވަކިން އޮތް ނަމަވެސް، ޑިޖިޓަލް ފައިނޭންސްގެ ސަބަބުން ކޮންމެ ތަނެއްގައި ހުރެގެންވެސް ފަސޭހަކަމާއެކު ބޭންކިންގ ޚިދުމަތް ހޯދައި، މުޅި ރާއްޖޭގެ ފަރުދުންނާއި ވިޔަފާރިތައް މާލީ ގޮތުން ގުޅުވައިދީފައިވެއެވެ.
މާލީ ޚިދުމަތްތަކާއި އިންޝުއަރެންސްގެ ޚިދުމަތްތައް ރާއްޖޭގެ ހުރިހާ ސަރަޙައްދަކަށް ފުޅާކުރުމަށް ކުރި މަސައްކަތްތަކުގެ އަގު ވަޒަންކޮށް، ”އެކްސެލެންސް އިން ފައިނޭންޝަލް އިންކްލޫޝަން“ އެވޯޑް ޖޮއިންޓްކޮށް ލިބިފައިވަނީ މޯލްޑިވްސް އިސްލާމިކް ބޭންކް (އެމްއައިބީ) އަދި އެލައިޑް އިންޝުއަރެންސް ކޮމްޕެނީއަށެވެ.
މި އެވޯޑަކީ މާލީ ޚިދުމަތްތައް ހޯދުމުގައި ހުރި ހުރަސްތައް ނައްތާލައި، އާންމު ރައްޔިތުންނަށް ބޭންކިންގ، އިންޝުއަރެންސް އަދި އެހެނިހެން މާލީ ޚިދުމަތްތައް ފަސޭހައިން ލިބޭނެ މަގު ފަހިކޮށްދޭ މުއައްސަސާތަކަށް ދޭ އެވޯޑެކެވެ.
އެމްއައިބީއަށް މި އެވޯޑް ލިބުނީ އެ ބޭންކުން ތައާރަފުކުރި ”އެޕްލައި ނައު“ ޑިޖިޓަލް ޕްލެޓްފޯމްގެ ސަބަބުންނެވެ. މި ޕްލެޓްފޯމް މެދުވެރިކޮށް ކަސްޓަމަރުންނަށް ދުރުގައި ތިބެގެން ބޭންކިންގ ޚިދުމަތްތަކަށް އެދުމުގެ ފުރުސަތު ވަނީ ފަހިވެފައެވެ.
އެމްއެމްއޭއިން ބުނި ގޮތުގައި، މި ޚިދުމަތުގެ ސަބަބުން މާލެއިން ބޭރުގައި ދިރިއުޅޭ ކަސްޓަމަރުންނަށް ކުރިމަތިވި ދަތިތައް މަދުވެ، ޝަރީޢާ ހަމަތަކަށް ފެތޭ ބޭންކިންގ ޚިދުމަތްތައް މުޅި ރާއްޖެއަށް ފުޅާވެގެން ގޮސްފައިވެއެވެ.
އެވޯޑް ޕެނަލުން ވަނީ އިސްލާމިކް ބޭންކިންގ ޚިދުމަތްތައް ރާއްޖޭގެ އެކި ކަންކޮޅުތަކަށް ފޯރުކޮށްދީ، މާލީ ނިޒާމުގެ ތެރޭގައި އެންމެން ބައިވެރިކުރުވުމަށް އެމްއައިބީއިން ކުރަމުންދާ މަސައްކަތްތައް ފާހަގަކޮށްފައެވެ.
އެލައިޑް އިންޝުއަރެންސްއަށް މި އެވޯޑް ލިބިފައިވަނީ އިންޝުއަރެންސްގެ ޚިދުމަތްތައް ފުޅާކޮށް، ފަރުދުންނާއި ވިޔަފާރިތަކަށް މި ޚިދުމަތް ފަސޭހައިން ލިބޭނެ ގޮތް ހަދައިދިނުމުންނެވެ. އެމްއެމްއޭއިން ބުނި ގޮތުގައި، އެލައިޑުން ވަނީ އިންޝުއަރެންސް ޚިދުމަތްތައް ހޯދުން ފަސޭހަކޮށްދިނުމުގެ އިތުރުން، ޤައުމުގެ މާލީ ރައްކާތެރިކަމުގެ ނިޒާމުގައި ބައިވެރިވުމަށް އާންމުންނަށް ހިތްވަރު ދިނުމުގެ ގޮތުން ތަފާތު މަސައްކަތްތަކެއް ކޮށްފައެވެ.
އެލައިޑް އިންޝުއަރެންސްގެ މަސައްކަތްތަކުގެ ސަބަބުން ގިނަ ބަޔަކު ރަސްމީ މާލީ ނިޒާމުގެ ތެރެއަށް ވަދެ، މާލީ ގޮތުން ލިބިދޭ ރައްކާތެރިކަން އިތުރުވެގެން ގޮސްފައިވާކަމަށް އެވޯޑް ޕެނަލުން ބުންޏެވެ.
އެމްއެމްއޭއިން ހާމަކުރި ގޮތުގައި، މާލީ ނިޒާމުގެ ތެރޭގައި އެންމެން ބައިވެރިކުރުވުމަކީ (ފައިނޭންޝަލް އިންކްލޫޝަން) ޤައުމީ އިޤްތިޞާދީ ތަރައްޤީގެ މުހިންމު އެއް ތަނބެވެ. މީގެ ބޭނުމަކީ ފަރުދުންނާއި ވިޔަފާރިތަކަށް އަތްފޯރާ ފަށުގައި އެކަށީގެންވާ ބޭންކިންގ، ސޭވިންގްސް، އިންޝުއަރެންސް އަދި ޕޭމަންޓް ނިޒާމުތައް ފޯރުކޮށްދިނުމެވެ.
މަރުކަޒީ ބޭންކުން ފާހަގަކުރި ގޮތުގައި، މާލީ ޚިދުމަތްތައް އެންމެންނަށް ލިބޭނެ މަގު ފަހިކޮށްދިނުމަކީ އިޤްތިޞާދީ ހަރަކާތްތަކުގައި ބައިވެރިވުން އިތުރުވެ، ވިޔަފާރިތައް ކުރިއަރައި، ޤައުމުގެ ދިގު މުއްދަތުގެ އިޤްތިޞާދީ ކުރިއެރުމަށް މަގުފަހިވާނެ ކަމެކެވެ.
މޯލްޑިވްސް ފައިނޭންޝަލް ސެކްޓަރ އެވޯޑްސް ދީފައިވަނީ ޖުމްލަ ހަތް ދާއިރާއަކުންނެވެ. އޭގެ ތެރޭގައި ފައިނޭންޝަލް އިންކްލޫޝަން، ފައިނޭންޝަލް ލިޓްރަސީ އެންޑް ކަސްޓަމަރ އެމްޕަވަރމަންޓް، ޑިޖިޓަލް ފައިނޭންސް އެންޑް އިނޮވޭޝަން، ސަޕޯޓް ފޯ އެމް.އެސް.އެމް.އީސް، ސަސްޓެއިނަބަލް އެންޑް ގްރީން ފައިނޭންސް، ފައިނޭންޝަލް އިނޮވޭޝަން، އަދި މާލީ ދާއިރާއަށް ކޮށްދީފައިވާ ހާއްސަ ޚިދުމަތްތަކުގެ ދާއިރާ ހިމެނެއެވެ.
މި އެވޯޑުތަކުގެ ޒަރީއާއިން އެމްއެމްއޭގެ އަމާޒަކީ، މާލީ ދާއިރާގައި އައު އީޖާދުތަކަށް ހިތްވަރުދީ، ފާހަގަކޮށްލެވޭ ކާމިޔާބީތަކުގެ އަގުވަޒަންކުރުމެވެ. އަދި މުއައްސަސާތަކުން ޑިޖިޓަލް ބަދަލުތަކަށް އިންވެސްޓްކޮށް، މާލީ ޚިދުމަތްތައް ފުޅާކުރަމުންދާއިރު، ރާއްޖޭގެ މާލީ ނިޒާމު އިތުރަށް ހަރުދަނާކޮށް ކުރިއެރުވުމަށް ބާރުއެޅުމެވެ.
