ކިއުބާގައި ތިބި ދިވެހި ދަރިވަރުންނަށް ކެއާ ޕެކޭޖުތައް ފޮނުވައިދީފި

ކިއުބާގައި ކިޔަވަން ތިބި ދިވެހި ދަރިވަރުންތަކަށް އާއިލާގެ ފަރާތުން ފޮރިން މިނިސްޓްރީ މެދުވެރި ވެގެން ކެއާ ޕެކޭޖުތައް ފޮނުވައިދީފި އެވެ.

ކޮވިޑް-19ގެ ސަބަބުން އާއްމު ދިރިއުޅުމަށާއި ޒަރޫރީ ތަކެތި ހޯދުމަށް ދަތިތައް ދިމާވެފައިވާ ގައުމުތަކުގައި ތިބި ދިވެހި ދަރިވަރުންނަށް އެހީތެރިކަން ފޯރުކޮށްދިނުމަށް ފޮރިން މިނިސްޓްރީއިން ކުރަމުންދާ މަސައްކަތުގެ ތެރެއިން، ކިއުބާގައި ތިބި ދިވެހި ދަރިވަރުންނަށް ބޭނުންވާ ކެއަރ ޕެކޭޖްތައް ފޮނުވަނީ ސްރީލަންކާ ސަރުކާރުގެ އެހީތެރިކަމާއެކުގައެވެ.

މިކަމަށް މަގިފަހިކުރުމަށް ފޮރިން މިނިސްޓްރީ އާއި ލަންކާގައި ދިވެހި ހައިކޮމިޝަން ގުޅިގެން ލަންކާގެ ފޮރިން މިނިސްޓްރީއާ ދެމެދު ގިނަ މަޝްވަރާތަކެއް ކުރެވިފައިވާއިރު، ކޮންމެ ދަރިވަރަކަށް 20 ކިލޯގެ ތަކެތި އާއިލާތަކުން ފޮނުވާފައިވާކަމަށް ފޮރިން މިނިސްޓްރީން ވަނީ މައުލޫމާތު ފޯރުކޮށްދީފައެވެ.

މިނިސްޓްރީން ބުނެފައިވަނީ ކެއާ ޕެކޭޖުތައް ފޮނުވުމުގައި ހަޔާ އެޑިއުކޭޝަން މިނިސްޓްރީ، އިސްލާމިކް މިނިސްޓްރީ އާއި އެމްއޭސީއެލް އަދި ކަސްޓަމްސް އާއި އޭވިއޭޝަން ސެކިއުރިޓީ ކޮމާންޑްގެ އެހީތެރިކަން ލިބިފައިވާ ކަމަށެވެ.

ކޮވިޑް-19 އާ ގުޅިގެން ގިނަ ގައުމުތަކުގެ ބޯޑަރުތައް ބަންދުކޮށްފައިވާއިރު، މީގެ ކުރިން ލަންކާ، އިންޑިއާ، ތައިލެންޑް އަދި މެލޭޝިއާގައި ތިބި ދިވެހިންނަށް ޕެކޭޖްތައް ފޮނުވާފައިވެއެވެ.