ތުރުކީގައި ހުންނަ ސައުދީ އެމްބަސީގެ ތެރޭގައި މަރާލި ސައުދީ ނޫސްވެރިޔާ ޖަމާލް ޚާޝުގްޖީގެ މަރުގެ މައްސަލައިގައި ދައުވާ ކުރެވޭ މީހުުންގެ ތެރެއިން އަށް މީހެއްގެ މައްޗަށް ކުށް ސާބިތުވެއްޖެ އެވެ.
ސައުދީ ކޯޓުން ވަނީ އެ މައްސަލަ ބަލައި ނިންމާ މަރުގެ މައްސަލައިގެ އުފުލާފައިވާ ދައުވާ އަށް މީހެއްގެ މައްޗަށް ސާބިތުވާ ކަމަށް ނިންމާފައެވެ. އެ އަށް މީހުންނަށް ވަނީ ޖަލު ހުކުމް އިއްވާފައެވެ.
އެގޮތުން ޖަލުގެ ހުކުމް އިއްވި މީހުންގެ ތެރެއިން ފަސް މީހެއްގެ މައްޗަށް ވަނީ 20 އަހަރުގެ ޖަލު ހުކުމެއް އިއްވާފައެވެ. އެ މީހުންނަށް 20 އަހަރުގެ ހުކުމެއް އިއްވާފައިވަނީ ޚާޝުގްޖީ މަރާލުމުގައި ބައިވެރިވެފައިވާ ކަމަށް ބުނެއެވެ.
ދައުވާ ސާބިތުވި ބާކީ ތިބި ތިން މީހުންގެ ތެރެއިން އެކަކަށް 10 އަހަރުގެ ޖަލު ހުކުމެއް އިއްވި އިރު ދެމީހަކަށް ވަނީ ހަތް އަހަރުގެ ޖަލު ހުކުމެއް އިއްވާފައެވެ.
ސައުދީ އަރަބިއްޔާގެ ޕަބްލިކް ޕްރޮސެކިއުޝަނުން މައްސަލަ ބަލައި ނިންމުމަށްފަހު ބުނެފައިވަނީ އެ މައްސަލައިގެ ޕަބްލިކް އަދި ޕްރައިވެޓް ކޭސްތައް މިހާރު ބަންދުކޮށްފައިވާ ކަމަށެވެ.
advertisment