މިދިޔަ ޑިސެމްބަރު މަހުގެ 20 ގައި ޝީ ބިލްޑިންގައި ބޭއްވި ކައިވެނި ހަފްލާއަކުން ބަޔަކު ކޮވިޑަށް ޕޮޒިޓިވް ވެ އުފެދުނު ކްލަސްޓާއިން ބަލި ޖެހުނު މީހުންގެ އަދަދު 92 އަށް އަރައިފިއެވެ.
ޕާޓީއިން ކޮވިޑުގެ ކޭސްތައް ފާހަގަކުރެވި ހެލްތް އިމަޖެންސީ އޮޕަރޭޝަންސް ސެންޓަރުން އެކަން މީޑިއާތަކާއި ހިއްސާކޮށްފައި ވަނީ ޑިސެމްބަރު 26 ގައެވެ. އެޗްޕީއޭގެ ގައިޑްލައިންތަކާއި ހިލާފަށް ބޭއްވި އެ ހްފްލާގައި 120 މީހަކު ބައިވެރިވެފައިވާކަމަށް އެޗްޕީއޭއިން ވަނީ މައުލޫމާތު ދީފައެވެ.
އެޗްޕީއޭގެ ވެބްސައިޓުން ކޮވިޑު ކްލަސްޓާތަކުގެ މައުލޫމާތު އެނގެން ހުރެއެވެ. އަދި އެ މައުލޫމާތުތަކުގައި ވާ ގޮތުން މިހާތަނަށް އެ ކްލަސްޓާއިން 92 މީހަކު ވަނީ ބައްޔަށް ޕޮޒިޓިވްވެފައެވެ.
ބައްޔަށް ޕޮޒިޓިވް ވި މީހުންގެ ތެރޭގައި، އުމުރުން ދުވަސް ވީ ފަރާތްތަކާއި، ކުޑަކުދިން ހިމެނެއެވެ.
އެޗްއީއޯސީން މީގެ ކުރިން ހާމަކޮށްފައިވާ ގޮތުން، ޕޮޒިޓިވް ވި މީހުންގެ ކޮންޓެކްޓުންގެ ގޮތުގައި 260 މީހަކު ވަނީ ފާހަގަ ކުރެވިފައެވެ. އެހެން ނަމަވެސް އޭގެ ފަހުން ވެސް ގިނަ ބަޔަކު ކްލަސްޓާއިން ޕޮޒިޓިވެފައިވާތީ، ކޮންޓެކްޓުން އެއަށް ވުރެ އިތުރުވާނެކަމަށް ބެލެވެއެވެ.
މިއީ މާލޭގައި ކޮވިޑު ފެތުރި، ލޮކްޑައުންގެ ލުއިތަކެއް ދިން ފަހުން ފެނުނު އެންމެ ބޮޑު އެއް ކްލަސްޓާއެވެ.
advertisment