ކޮވިޑް-19 އަށްފަހު ރާއްޖޭގެ ފަތުރުވެރިކަން އާރާސްތުވަމުން އަންނަ މި ދުވަސްވަރު، އެ ކުރިއެރުން ފަހަތަށް ދާނޭހެން އެއްވެސް ފަރާތަކުން އަމަލުތައް ނުބެހެއްޓުމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ގޮވާލައްވައިފިއެވެ.
ކޮވިޑް-19އާ އެކު އަޅާގައިވާ ފިޔަވަޅުތަކަށް ލުއިދިން ނަމަވެސް މިހާރު އަނެއްކާވެސް ބަލީގެ އާ ވައްތަރުތަކެއް ދުނިޔޭގެ އެކި ކަންކޮޅުތަކުން ފެނި ބަލީގެ ނުރައްކާ ބޮޑުވަމުންދާ ހާލަތުގައި، ރާއްޖެއިން މިކަމަށް ނުހަނު ވިސްނަން ޖެހޭކަމަށް މައުސޫމް ވިދާޅުވިއެވެ.
ރާއްޖޭގެ އިޤްތިޞާދު ބަރޯސާވެފައިވާ ގޮތުން ފަތުރުވެރިކަމަކީ އެންމެ މުހިންމު އެއްބައިވެރިޔާކަމަށްދެކި މިހާރު ލިބިފައިވާ ކުރިއެރުން ކުޑަކޮށްގެން ފަހަތަށް ސޮއްސާލައިގެން ނުދާނޭ ގޮތަކަށް ހުރިހާ ބޭފުޅުންގެ އަމަލުތައް ބެހެއްޓެވުމަށް މިނިސްޓަރު މައުސޫމް ވަނީ ގޮވާލާފައެވެ.
ރައްކާވެ ތިބިއްޔާ #ދަތުރުފަތުރު
އެޗު.ޕީ.އޭ އާއި ޓޫރިޒަމްގެ ގައިޑުލައިންތަކަށް އަކުރުން އަކުރަށް ފިލިން ފިއްޔަށް އަމަލުކުރަމާތޯ.
ހޯއްދެވި ކުރިއެރުން ފަހަތަށް ސޮއްސާލުމަށް ޖާގަނުދެމާތޯ.
އުފުއްލަވަމުންގެންދަވާ ތަކުލީފަށާއި، ދެއްވާ އެއްބާރުލުމަށް ފަށްފަށުން ޝުކުރިއްޔާ!— Abdulla Mausoom (@Mausoom_Maus) January 11, 2021
ރާއްޖޭގައި އޮޕަރޭޓްކުރާ ރިސޯޓްތަކުގެ ތެރެއިން 17 ރިސޯޓެއް ފިޔަވައި ދެން ހުރި ހުރިހާ ރިސޯޓެއް މިމަސް ނިމުމުގެ ކުރިން އަލުން އޮޕަރޭޝަންއަށް އަންނާނެކަމަށް ޓޫރިޒަމް މިނިސްޓްރީން ވަނީ ބުނެފައެވެ.
