ހަމަނުޖެހުން ހިންގާ، ވޯޓު ގުނަން ހުރަސް އެޅީ ޕީޕީއެމްއިން: އެމްޑީޕީ

ލޯކަލް ކައުންސިލް އިންތިހާބުގެ 18 ވޯޓު ފޮއްޓެއް އަލުން ގުނުމުގެ މަސައްކަތް ކުރިޔަށް ގެންދަނިކޮށް އިންތިހާބާއި ބެހޭ މަރުކަޒުގައި ހަމަނުޖެހުން އުފެއްދީ އިދިކޮޅު ޕީޕީއެމް، ޕީއެންސީންކަމަށް އެމްޑީޕީން ބުނެފި އެވެ.

ޝަކުވާ ހުށަހަޅާފައިވާ ބައެއް ވޯޓު ފޮށިތައް ގުނުމުގެ މަސައްކަތް ކުރިޔަށް ގެންދިޔަ ވަގުތު އެ ސަރަހައްދަށް އެންމެ ފުރަތަމަ އެއްވީ އިދިކޮޅުންނެވެ. އަދި އެ އެއްވުން ހޫނުވީ، ކުއްލިގޮތަކަށް އެމްޑީޕީގެ އިސް ބޭފުޅުންތަކާއި އެކު ރައީސް ނަޝީދު އިލެކްޝަންސް ކޮމިޝަނަށް ވަޑައިގަތުމުންނެވެ.

އިދިކޮޅުގެ މެމްބަރުން ވަނީ، ރައީސް ނަޝީދު ވަޑައިގަތީ ހަމަނުޖެހުން އުފެއްދުމަށްކަމަށް ބުނެފަ އެވެ.

އެއްވުން ހަމަނުޖެހުމަކަށް ބަދަލުވީ، ދެ ފަރާތުގެ ސަޕޯޓަރުން ވެސް އެއްވެ ބަހުގެ ހަމަލާތައް ރައްދު ކުރަން ފެށި ހިސާބުންނެވެ. އަދި ފުލުހުން ވަނީ، އެ ސަރަހައްދަށް އެއްވެފައިތިބި އާއްމުން ފަހަތަށް ޖައްސައި ބާރުގެ ބޭނުންކޮށް ޕެޕާ ސްޕްރޭ ޖަހާފައެވެ.

ހަމަނުޖެހުންތަކާއި ގުޅިގެން އެމްޑީޕީއާއި ރައީސް ނަޝީދަށް ފާޑުކިއުން އަމާޒުވެފައިވަނިކޮށް، އެމްޑީޕީން އާއްމު ކުރި ނޫސްބަޔާނެއްގައި ބުނީ އިންތިހާބުގެ ވޯޓު ގުނުމުގެ މަސައްކަތް އިލްކެޝަންސް ކޮމިޝަންގައި ހިނގަމުން ދަނިކޮށް އެތަނަށް ޕީޕީއެމްގެ އިސްވެރިންނާއި ޕީއެންސީގެ ރައީސް ގޮސް ކޮމިޝަނުގެ މުވައްޒަފުންގެ މަސައްކަތަށް ހުރަސް އެޅި ކަމަށެވެ. އަދި އެއީ ޕާޓީގެ ވަރަށް ބޮޑު ކަންބޮޑުވުމެއް ކަމަށާއި، ކޮމިޝަންގެ މަސައްކަތް ކުރިޔަށް ގެންދިއުމަށް ހުރަސް އެޅި ބޭފުޅުންނާއި މެދު ގާނޫނީ ގޮތުން ފިޔަވަޅު އަޅަންޖެހޭނެ ކަމަށް ބަޔާނުގައިވެ އެވެ.

އެމްޑީޕީން ވަނީ، ވޯޓުގެ ނަތީޖާ އިއުލާނު ކުރުމުގެ މަސައްކަތް ދެފުށް ފެންނަގޮތަށް އިލެކްޝަންސް ކޮމިޝަނުން ކުރުމުގެ ޖާގަ ދިނުމަށް ގޮވާލާފައެވެ.

Alhugandu EC ge idhaara dhoshah dhaanjehunee T4 ge vote foshi alun gunumah thayyaaru vefavanikoh PPM ge Leader aai isverin EC idhaara ah vadhevadaigane 30 minute veeiruves nunukunneveema. Officialun noon evves meehakah EC idaaraa ah vadhevigen nuvaane. Alhugandu huree beyruga.

— Mohamed Nasheed (@MohamedNasheed) April 13, 2021

ބަހުގެ ހަމަލާތައް ރައްދުވުމުން އެ ސަރަހައްދު ދޫކޮށް ވަޑައިގެން، ރައީސް ނަޝީދު ކުރައްވާފައިވާ ޓްވީޓެއްގައި ވިދާޅުވީ އެމަނިކުފާނު އެތަނަށް ވަޑައިގަތީ ހެންވޭރު ދެކުނު ދާއިރާގެ ފޮށި ތައްޔާރުވެފައި ވަނިކޮށް، ޕީޕީއެމްގެ ލީޑަރާއި އިސްވެރިން އިލެކްޝަންސް ކޮމިޝަނުގެ އިދާރާގެ ތެރެއަށް ވަދެ، 30 މިނެޓު ވީއިރުވެސް ނުނިކުންނެވުމުން ކަމަށެވެ. ރައީސް ނަޝީދު ވިދާޅުވީ އީސީގެ އޮފިޝަލުން ނޫން އެހެން މީހަކަށް، އީސީގެ އިދާރާއަށް ވަދެވިގެން ނުވާނެ ކަމަށެވެ.