ސްޕެޝަލް ޕްރޮޓެކްޝަން ގްރޫޕް (އެސްޕީޖީ)ގެ ކޮމާންޑަރުން ބަދަލު ކޮށްފިއެވެ.
އެގޮތުން އެސްޕީޖީގެ ކޮމާންޑަރުގެ މަގާމަށް މިހާރު ވަނީ ކާނަލް އަބްދުލް މުއިއްޒު އައްޔަންކޮށްފައެވެ. އަދި ޑެޕިއުޓީ ކޮމާންޑަރަކަށް ވަނީ މޭޖާ މޫސާ ރަމީޒު އައްޔަންކޮށްފައެވެ. އެސްޕީޖީ އަކީ ސިފައިންގެ ތެރޭގައި އޮންނަ ހަށިފާރަވެރިންގެ ޔުނިޓެވެ.
ހަމައެއާއެކު އެސްޕީޖީގެ ފަސްޓް ސާޖަންޓްގެ ގޮތުގައި އަބްދުﷲ ޖަމީލު ވަނީ ހަމަޖައްސާފައެވެ.
އެސްޕީޖީގެ ކޮމާންޑަރުން ބަދަލުކޮށްފައި މިވަނީ، އެ ގްރޫޕުން ސެކިއުރިޓީ ފޯރުކޮށްދޭ، ރައްޔިތުންގެ މަޖިލީހުގެ ރައީސް، ރައީސް ނަޝީދު އަވާހަރަކޮށްލުމަށް ބޮމުގެ ހަމަލާއެއް ދީފައި ވަނިކޮށެވެ. އަދި އެ ހަމަލާއާ ގުޅުވައިގެން ސެކިއުރިޓީގެ ކަންކަން ބެލެހެއްޓުމުގައި އެމްއެންޑީއެފް އަށް ގޯސްތަކެއް ހެދިފައިވާ ކަމަށް ބައެއް ފަރާތްތަކުން އަންނަނީ ބުނަމުންނެވެ.
