އަލީ ޒާހިރުގެ އެކައުންޓުން ހުތުރު ބަހުން ކުރި ޓްވީޓާއި އެކު އެމްޑީޕީ މެމްބަރުންގެ ކަންބޮޑުވުން!

ކުރީގެ ރައީސް، އަދި އެމްޑީޕީގެ ރައީސް މުހައްމަދު ނަޝީދަށް ނިސްބަތް ކުރައްވައި، ހުތުރު ބަހުން ޓްވީޓުތަކެއް ކުރި މައްސަލައިގައި އަދާލަތު ޕާޓީގެ ސްލޮޓެއްގައި ޗީފް އޮފް ސްޓާފަކަށް ހުންނެވި އަލީ ޒާހިރަށް އެމްޑީޕީގެ މެމްބަރުންގެ ނުރުހުން އަމާޒުވާން ފަށައިފި އެވެ.

ވެރިފައިޑް އެކައުންޓެއް ބަޔަކު ހެކް ކުރިކަމަށް އަލީ ޒާހިރު މިއަދު ވިދާޅުވީ، އެމްޑީޕީގެ އިސް އެކްޓިވިސްޓެއްކަމަށް ވާ ޝަމްއޫން ޖަލީލް (ލޫކަސް) ގެ ޓްވީޓަކަށް ހަޑި ބަސްތަކެއް ބޭނުންކޮށް ރައްދު ދިން މައްސަލައެއް ހޫނުވެފައި ވަނިކޮށެވެ.

އަންނަ މޭއި މަހުގެ 14 ގައި ބާއްވާ އެމްޑީޕީގެ އެތެރޭގެ އިންތިހާބުގައި، ޗެއާޕާސަންގެ މަގާމުގެ ވާދަވެރިކަން އުފެދި ޕާޓީގެ ތެރޭގައި ބަހުގެ ހަމަލާތައް ދިނުން ވަނީ އާއްމުވެފަ އެވެ. ހާއްސަކޮށް ރައީސް ނަޝީދު އެމްޑީޕީން ބޭރުކޮށްލަން މަސައްކަތް ކުރާކަމުގެ ތުހުމަތުތައް ސަރުކާރާއި އަރިސް މެމްބަރުންނަށް ދަނީ ކުރެވެމުންނެވެ.

ރައީސް އިބްރާހިމް މުހައްމަދު ސޯލިހުގެ ތާއީދާއި އެކު އިންތިހާބުގައި ވާދަކުރައްވާ، އިކޮނޮމިކް މިނިސްޓަރު ފައްޔާޒަށް އަމާޒުކޮށް ލޫކަސް ކުރި ޓްވީޓުގައި ވަނީ ޕާޓީ ނުހިނގާކަމަށް ނުވަތަ ޖަގަހަތަށް ނެތްކަމަށް ބުނެ ވާހަކަތައް ދައްކަވާއިރު މިނިސްޓަރުކަމަށް ފައްޔާޒް އައީ ވެސް ޕާޓީގެ ޖަގަހަތަކުން ކުރި މަސައްކަތުން ކަމަށެވެ. އަދި ޕާޓީއަށް ކުރިންއެރުންތައް ވެސް ލިބުނީ ލީޑާޝިޕްގެ މަސައްކަތްތަކުން ކަން ފާހަގަ ކުރައްވައި، ލޫކަސް ވަނީ ފައްޔާޒްގެ މަގްސަދާއި މެދު ސުވާލު އުފައްދާފަ އެވެ.

މި ޓްވީޓަށް ރައްދު ދެއްވައި އަލީ ޒާހިރުގެ އެކައުންޓުގެ ޓްވީޓުގައި ބިނީ އެމްޑީޕީ ވެރިކަމަށް އައީ ރައީސް ނަޝީދު ޔޫކޭގައި ގޮނޑި ދުއްވައިގެން ތޯ ސުވާލުކޮށްފަ އެވެ. އަދި ރައީސް ސޯލިހު ވެސް ކެތްގަދަކަމަށް އޭގައި ވެއެވެ.

”ކަލޯ ހިތުން ޔޫކޭގައި ގޮނޑި ދުއްވަން އިން މީހަކު ކުރި މަސައްކަތުން އެކަނި ކަމަށްތަ އެމްޑީޕީ މިއަދު މިހިސާބަށް އައީ؟“

މިކަމާއި ގުޅިގެން އަލީ ޒާހިރު ވިދާޅުވީ، އެއީ އޭނާ ކުރި ޓްވީޓެއް ނޫންކަމަށާއި އެކަން ސަމާލުކަމަށް އައުމާއި އެކު މައްސަލަ ފުލުހަށް ހުށަހަޅާފައިވާ ކަމަށެވެ.

Earlier today, my twitter account was compromised and unauthorized tweets sent out. My account is now secured with extra security measures and a complaint lodged with the Police.
I believe this was an attempt to wrongly portray me as having a role in the upcoming MDP elections.

— Ali Zahir (alipi) (@alixahir) March 22, 2022

އަލީ ޒާހިރު ވިދާޅުވީ ބަޔަކު އޭނާގެ އެކައުންޓު ހެކް ކުރީ، އެމްޑީޕީ އާއި އެކު ކެމްޕެއިނުގައި މަސައްކަތް ކުރާކަން ދައްކައި ނަފްރަތު އުފެއްދުމަށް ކަމަށެވެ.

މި މައްސަލައިގައި އެމްޑީޕީގެ ގިނަ މެމްބަރުން ވަނީ، ވެރިފައިޑް އެކައުންޓެއް ހެކް ވުން ގަބޫލެއް ނުކުރެވޭކަމަށް ބުނެ އެވެ. އެގޮތުން މަޖިލީހުގެ ނައިބު ރައީސް އީވާ އަބްދުﷲ ވެސް ޓްވީޓެއް ކުރައްވައި ވިދާޅުވީ އެމްޑީޕީގެ އެތެރޭގެ އިންތިހަބަކާއި އަލީ ޒާހިރާއި ކުޑަ ވެސް ގުޅުމެއް ނޯންނާނެ ކަމަށެވެ. އެމްޑީޕީގެ މެމްބަރުންގެ ބުރަ މަސައްކަތުން ގެނައި ސަރުކާރުގެ މަގާމެއްގައި ހުރެ ޕާޓީ ހަރާބު ކުރަން މެމްބަރުން ފުރުސަތެއް ނުދޭނެކަމަށް އީވާ ވިދާޅުވި އެވެ.

މިއީ MDPގެ އެތެރޭގެ އިންތިޚާބެއް.އަލީ ޒާހިރާ ކުޑަވެސް ގުޅުމެއް ނެތް.

MDPމެމްބަރުންގެ ބުރަ މަސައްކަތުން ގެނައި ސަރުކާރުގެ ތިޔަވަރު މަޤާމެއްގައި އިންނެވުނެއްކަމަކު، މި ޕާޓީ ހަރާބުކުރާކަށް މިޕާޓީ މެމްބަރުން ފުރުސަތެއް ނުދޭނެ.

ފަހަތަށް ޖެހިވަޑައިން މިޕާޓީއަށް މިކަން ދޫކޮށްލައްވާ. pic.twitter.com/uk1lUDDxwX

— Eva Abdulla ????❓ (@evattey) March 22, 2022

އެމްޑީޕީގެ ޗެއާޕާސަނަކަށް ވާދަ ކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވެސް ވަނީ މި މައްސަލައިގައި ކަންބޮޑުވުން ފާޅު ކުރައްވާފަ އެވެ.

މި މައްސަލައިގައި އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވީ މިއަދު ރައީސް އޮފީހުގެ އެކައުންޓުން ވެސް އޮޅިގެން ޓްވީޓު ކުރެވޭ ހިސާބަށް ކަންތައް ގޮސްފައިވާ ކަމަށެވެ. މުޅި ދައުލަތް އިންތިހާބުގައި ބޭނުން ކުރަނީ އޮޅިގެން ތޯ ވައްޑޭ ސުވާލު އުފެއްދެވި އެވެ.

ރައީސް އޮފީސް އެކައުންޓުތަކުން އޮޅިގެން ޓުވީޓްކުރެވެނީ. ޗީފް އޮފް ސްޓާފަށް އޮޅިގެން ޓުވީޓް ކުރެވެނީ. އެމްޑީޕީގެ އެތެރޭގެ އިންތިޚާބެއްގައި އޮޅިގެން މުޅި ދައުލަތް ބޭނުންކުރެވެނީ. އެހެން ނުހައްދަވާ! pic.twitter.com/MAbA79K8i5

— Waddey (@waddey_) March 22, 2022

އެމްޑީޕީގެ ކުރީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވީ ކުރާ ނުރަނގަޅު ކަންކަން މަތިޖެހުމަށް ނުވަތަ ފޮރުވުމަށް ފަހަރަކު މުއައްސަސާއެއް ބޭނުން ކުރާނަމަ ދައުލަތާއި މެދު ރައްޔިތުންގެ އިތުބާރު ގެއްލޭނެ ކަމަށެވެ. އެހެން އެގޮތަށް ނެހެއްދެވުމަށް އިލްތިމާސްކޮށް ހަސަން ލަތީފް ގޮވާލީ  ޕާޓީއާއި ސަރުކާރާއި ދައުލަތުގެ އިތުބާރު ގެއްލުނަ ނުދިނުމަށެވެ. 

@alixahir ގެ އެކައުންޓަކީ ވެރިފައިޑް އެކައުންޓެއް. ޓޫފެކްޓަރ އޮތެންޓިކޭޝަން އިންނާނެ. ކީއްވެތޯ ކުޑަ އިރުކޮޅެއް ފަހުން ހެކަރު ޓްވީޓުތައް ޑިލީޓް ކޮށްލީ؟ ހަގީގަތް އޮޅުވާލަން އުޅުނަސް ބޮޑުވަރު. https://t.co/f5Ut6cm1tt

— Hussain Firushan ???????? (@husnfirey) March 22, 2022

އަލީ ޒާހިރަކީ މީގެ ކުރިން ވެސް މިފަދަ ތުހުމަތުތަކެއް ކުރެވުނު ބޭފުޅެކެވެ. އޭގެ ތެރޭގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތްތަކަށް ނުފޫޒު ފޯރުވުމަށް ކޯޓުގެ ފަނޑިޔާރުންނަށް ގުޅައި ބައްދަލު ކުރި ވާހަކަތައް ހިމެނެ އެވެ. އެކަން މީޑީއާތަކުގައި މާ ބޮޑަށް ދެކެވެން ފެށުމުން، ރައީސް އޮފީހުގައި ކުއްލި ޕްރެސްއެއް ބާއްވައި އަލީ ޒާހިރު ވަނީ އޭނާގެ ދިފާއުގައި ވާހަކަ ދައްކާފަ އެވެ.

މީގެ އިތުރުން ޕީއެސްއެމް ބޯޑުގައި ހުންނެވި އަލީ މިދުހަތު (މިދޭ) އަށް ކުރި މެސެޖުތަކެއް ވެސް މައްސަލަ ވެސް ފެންމަތިވި އެވެ. ނަމަވެސް އެކަން ވެސް ދޮގުކޮށް އަލީ ޒާހިރު ވިދާޅުވީ އޭނާ އާއި މިދުހަތް އާއި ދުވަހަކު ބައްދަލު ވެސް ނުވާ ކަމަށެވެ. ޕީއެސްއެމްގެ ބޯޑުން މިދުހަތް ވަކި ކުރުމާ ގުޅިގެން އޭނާ އާއި އަލީ ޒާހިރާ ދެމެދު ދެކެވުނު ވާހަކަތަކެއް ފޭސްބުކްގައި އާއްމު ކުރުމުން، ޓްވީޓުތަކެއްގައި އަލީ ޒާހިރު ވިދާޅުވީ އެފަދަ އެއްވެސް ވާހަކައެއް މިދުހަތާއި ދެކެވިފައި ނުވާނެ ކަމަށެވެ.