ރަސްމީ ބަހެއްގެ ގޮތުގައި ރާއްޖޭގައި އިގިރޭސި ބަސް ކަނޑައަޅައިފިނަމަ ރާއްޖެ ތަރައްގީ ވެގެން ސްޕީޑް މާ ބޮޑަށް ހަލުވިވެގެންދާނެކަމުގައި ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަން ގޮވާލައިފި އެވެ.
އިނގިރޭސީ ބަހުގެ ދުވަހާއި ގުޅިގެން ފޮރިން މިނިސްޓަރު އަބްދުﷲ ޝާހިދު ޓްވީޓެއް ކުރުމުން އިކްރާމް ވަނީ ރާއްޖޭގެ ތަރައްގީއަށް ކުރިއެރުންތަކެއް އަންނާނީ އިނގިރޭސީ ބަސް ކުރިއަރުވައިގެން ކަމަށެވެ. މިއީ ރާއްޖޭގެ ތަރައްގީ ހަލުވި މިނެއްގައި ކުރި އަރާނެ ސަބަބެއްގެ ގޮތުގައި ވެސް އިކްރާމް ފާހަގަ ކުރި އެވެ.
އިކްރާމް ވިދާޅުވީ ރާއްޖޭގެ އިގްތިސާދު ހިނގަނީ ވަރަށް ބޮޑަށް އިނގިރެސީ ބަހަށް ބަރޯސާ ވެގެން ކަމަށެވެ. އެހެން ކަމުން “ދިވެހި ބަހަށް ކުރާ އިހުތިރާމަށް އުނިކަމެއް” ނާންނަހެން އިނގިރޭސި ބަސް އޮފިޝަލް ކުރުމަށް އިކްރާމް ގޮވާލި އެވެ.
Raajjeyga Dhivehi bahah kuraa ihthiraamah nikamethikameh naanna gothah English official language akah hedhaifinama raajje tharahgee vegen anna speed maa bodah haluive rahyithunnah kuraa faidhaa boduvaane. Raajjeyge igthisoadh higanee varah bodah igireysi bahah baroasaa vegen. https://t.co/3rS1CbWwsB
— Ikram Hassan MP (@ikramhassan) April 24, 2022
ދިވެހި ބަހަށް ބޮޑެތި ގޮންޖެހުންތަކެއް ދިމާވެފައިވާ މި ދަނޑިވަޅުގައި އިކްރާމް މިހެން ވިދާޅުވެ ޓްވީޓު ކުރެއްވުމާއިއެކު ގިނަ ބަޔަކު އަންނަނީ އޭނާއަށް ބޮޑެތި ފާޑުކިޔުންތައް އަމާޒުކުރަމުންނެވެ.
އިކްރާމަށް ރައްދު ދެއްވައި ދިވެހި ބަހުގެ އެކަޑަމީގެ ކުރީގެ ރައީސް އަޝްރަފް އަލީ ވިދާޅުވީ ދިވެހިރާއްޖޭގެ ރަސްމީ އަދި ގައުމީ ބަހަކީ ވެސް ދިވެހި ބަސް ކަމަށެވެ. ދިވެހި ބަހަކީ އަމިއްލަ ހައިސިއްޔަތެއް ލިބިފައި ވާ ފަހުރާއި ޝަރަފެއްކަން ފާހަގަކުރައްވައި އަޝްރަފް ވިދާޅުވީ ދިވެހި ބަހަކީ ދިވެހީންގެ އަމިއްލަވަންތަކަމުގެ ރަމްޒެއް ކަމަށެވެ. އެހެން ކަމުން ދިވެހި ގައުމު ކުރިއަރައި ދާނީ ވެސް މި ބަހާއި އެކުކަމަށް އޭނާ ވިދާޅުވި އެވެ.
“އިކްރާމަކީ ދިވެހިބަހުގެ ކުރިއެރުމަށް ޓަކައި އުފެއްދުންތެރި މަސައްކަތްތަކެއް ކުރެއްވި ބޭފުޅެކެވެ. އިކްރާމް ޓްރާންސްޕޯޓުގައި ހުންނެވި ދުވަސްވަރާއި އޭގެ ފަހުން މަޖިލީހަށް ވަޑައިގަތުމާ ދެމެދު ހުންނެވި ހުންނެވުމުގައި ދެތިން ފަހަރަކު ދިމާވެ ވާހަކަ ދެކެވުނެވެ. އޭރު ދެއްކެވި ވާހަކަފުޅުތަކުގެ މައުޒޫއަކީ ދިވެހި ބަސް ދިރުވާން ކުރަން ޖެހޭ މަސައްކަތްތަކުގެ މުހިންމުކަމެވެ. ގައުމީ ބަހުގެ މުހިންމު ކަމެވެ. އޭރު އިކްރާމްގެ ގައުމީ މާ ބޮޑު ބާރުވެރިކަމެއް ނުވަތަ އެފަދަ ހައިސިއްޔަތެއް ނެތެވެ.. އެކަމަކު މިއަދު ބަސްފުޅު ވިދާޅުވެ ތަންފީޒުކުރެއްވޭނޭ ހައިސިއްޔަތު ލިބިވަޑައިގަތުމުން ދައްކަވާ ވާހަކަފުޅު މުޅީން ތަފާތެވެ” އަޝްރަފު ވިދާޅުވި އެވެ.
އަޝްރަފް ވިދާޅުވީ މިއީ ވަރިހަމަ ނުކުރެވޭނެ ވަރުގެ ސީރިއަސް މައްސަލައެއް ކަމަށެވެ. މިފަދަ ބަދަލުތަކެއް ގެނައުމުން އޭގެ ނަތީޖާއަކީ ކޮބައިކަމާއި މެދު މެމްބަރު އެއްވެސް މިންވަރަކަށް ވިސްނާލިތޯ އޭނާ ސުވާލު އުފެއްދި އެވެ. އަދި އަމިއްލަވަންތަކަން ނަގައިލައި ހޯދޭނެ ކުރިއެރުމެއް ނޯންނާނެކަމަށް ވިދާޅުވި އެވެ. އެހެން ކަމުން ބަހަށް ލޮތްބެއް ނެތް މީހެއްގެ ވަތަނަށް ވެސް ލޮތްބެއް ނުހުންނާނެކަމަށް އަޝްރަފް ވަނީ ވިދާޅުވެފަ އެވެ.
އިކްރާމަކީ މީގެ ކުރިން ވެސް ސިޔާސީ ބައެއް ސަބަބުތަކާއި ހެދި ވެސް ފާޑުކިއުންތައް އަމާޒުވާ ބޭފުޅެކެވެ.