ހިޔާ ފްލެޓްތައް ހުންނަ ސަރަހައްދުގެ ކޯޓްޔާޑްގައި އާންމުން އިސްނަގައިން އިންދާފައި ހުރި ގަސްތައް ނަގައި އެ ސަރަހައްދު ހުސްކުރުމަށް ހައުސިންގް ޑިވެލޮޕްމެންޓް ކޯޕަރޭޝަން(އެޗްޑީސީ) އިން އަންގައިފިއެވެ.
އެޗްޑީސީއިން އާންމުކޮށްފައިވާ ބަޔާނުގައި ބުނެފައިވާ ގޮތުން، ކޯޓްޔާޑަށް ކަނޑައެޅިފައިވާ ސަރަހައްދުން އާންމުން އިންދާފައިވާ ގަސްތައް ނެގުމަށް އަންގާފައިވަނީ، އެ ސަރަހައްދު ތަރައްގީ ކުރުމުގެ މަޝްރޫޢ ފެށުމަށްޓަކައިއެެވެ. މި އެންގުމުގައި ވާގޮތުގެ މަތިން ފްލެޓްތަކުގައި ދިރުއެޅޭ ފަރާތްތަކުން ނުވަތަ އެހެނިހެން ފަރާތްތަކުންވެސް އެ ސަރަހައްދުގައި އިންދާފައިވާ ގަސްތައް ނެގުމަށް އަންގާފައިވަނީ ޖޫން މަހު 23 ވަނަ ދުވަހުގެ ކުރިންނެވެ.
ހުޅުމާލޭގެ ހިޔާ ކޯޓް ޔާޑު ހިމެނޭ ސަރަޙައްދުގައި އިންދާފައިވާ ގަސްތައް ނެގުމާގުޅޭ!https://t.co/t9UQvYdOGI
— HDC (@hdcmaldives) June 7, 2022
ހިޔާފް ފްލެޓް ސަރަހައްދުގެ ކޯޓްޔާޑް ތަރައްގީ ކުރުމުގެ މަޝްރޫޢގެ ދަށުން އެ ސައިޓު ހުސްކުރުމަށްޓަކައި، އިސްވެ އެންގިފައިވާ ތާރީހުގެ ކުރިން ނެގިފައިނުވާ ގަސްތައް އެޗްޑީސީއިން ނަގާ ސާފުކުރެވޭނެ ވާހަކަވެސް ނެރިފައިވާ ބަޔާނުގައި ބުނެފައިވެއެވެ.
މީގެއިތުރުން އެޗްޑީސީއިން އާންމުކޮށްފައިވާ ބަޔާނުގައި ބުނެފައިވަނީ، އެ ސަރަހައްދަކީ ކުދި ޕާކްތަކެއްގެ ގޮތަށް ފަރުމާ ކުރެވިގެންދާނެ ތަނެއް ކަމަށެވެ. އަދި މިކަމުގެ މަގުސަދަކީ، ސަރަހައްދުގައި ދިރިއުޅޭ ފަރާތްތަކަށް އެ ތަނަށް ޒިޔާރަތްކޮށް ހިތްހަމަޖެހޭފަދަ މާހައުލެއްގައި ވަގުތު ހޭދަކުރެވޭނެ ފުރުސަތު ފަހިކޮށްދިނުމަށެވެ.
advertisment