މީސް މީޑިއާގައި ބަރަހަނާ ފޮޓޯތަކެއް އާއްމު ކުރަމުން ގެންދާ ޓިކްޓޮކް ވީޑިއޯ ކުޅޭ، މުހައްމަދު ނަބީލް އެއް އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ
މިދިޔަ އޯގަސްޓު މަހުގެ ތެރޭގައި މީސްމީޑިއާގެ އެކި ޕްލެޓުފޯމުތަކުގައި އަންހެން ހެދުން އަޅައިގެން ބަރަހަނާ ފޮޓޯއާއި ވީޑިއޯ އާންމުކުރުމުގެ މައްސަލައެއްގައި ނަބީލު ވަނީ މީގެ ކުރިންވެސް ހައްޔަރުކޮށްފައެވެ. ނަބީލު ހައްޔަރުކުރުމަށްފަހު އޭނާގެ ބަންދާމެދު ގޮތެއް ނިންމަން ކުރިމިނަލް ކޯޓަށް ހާޒިރުކުރުމުން އެ ކޯޓުން އޭނާ މިނިވަންކުރިއެވެ.
އެ މައްސަލާގައި އޭނާ ދޫކޮށްލާފައިވަނީ ހިނގަމުންދާ މި މަހުގެ 2 ވަނަ ދުވަހުއެވެ. އޭނާ ދޫކޮށްލަން ކޯޓުން ނެރުނު އަމުރުގައި ބުނެފައިވަނީ އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ އޮތް ކަމަށް ފުލުހުން ފާހަގަކުރި ނަމަވެސް އޭނާއަށް ތުހުމަތުވާ ކުށުގެ ބާވަތަށް ބަލާއިރު އޭނާގެ ކިބައިން އެހެން މީހަކަށް ގެއްލުމެއް ލިބުމުގެ ފުރުސަތު ނެތްކަމަށެވެ.
މިއީ ނަބީލް ހައްޔަރު ކުރުމަށްފަހު ދޫކޮށްލި ދެވަނަ ފަހަރެވެ. ބަރަހަނާ ވީޑިއޯއެއް އާއްމުކުރި މައްސަލައިގައި މިދިޔަ އަހަރު ވެސް އޭނާ ހައްޔަރު ކުރުމަށްފަހު ދޫކޮށްލީ ސޯޝަލް މީޑިއާގައި ދެ މަސް ދުވަސް ވަންދެން ޕޯސްޓު ނުކުރުމަށް ޝަރުތުކޮށްފައެވެ.
