ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ނަން އޮންނާނެކަމަށް އެމަނިކުފާނުގެ ވެރިކަމުގައި ޑިފެންސް މިނިސްޓަރުގެ މަގާމު އަދާކުރައްވާފައިވާ އަމީން ފައިސަލް ވިދާޅުވެއްޖެއެވެ.
ރައީސް ނަޝީދު ކުރިއަށް އޮތް ރިޔާސީ އިންތިހާބުގައި ބައިވެރިވެވަޑައިިގަންނަވާނެކަމަށް އަމީން ވިދާޅުވެފައިވަނީ، އެމްޑީޕީގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސާލިހު އާއި ވާދަކުރެއްވުމަށްފަހު ނާކާމިޔާބީ އާއި ކުރިމަތިލައްވާފައިވަނިކޮށެވެ.
އެމްޑީޕީގެ ރިޔާސީ ޕްރައިމަރީގައި އެ ޕާޓީގެ އިސް ލީޑަރު ރައީސް ސާލިހަށް ލިބިވަޑައިގަތީ ވޯޓުގެ 61.10 އިންސައްތަކަމަށްވާއިރު، ރައީސް ނަޝީދު ނާކާމިޔާބީ އާއި ކުރިމަތިލެއްވީ 38.90 އިންސައްތައިގެ ވޯޓާއިއެކުއެވެ.
ރައީސް ނަޝީދު ކުރިމަތިލައްވާނެކަމަށް އަމީން ވިދާޅުވެފައިވާއިރު، ޕްރައިމަރީގެ ކާމިޔާބީ ފާހަގަކުރައްވަމުން ރައީސް ސާލިހުވަނީ އެމަނިކުފާނާއި ގުޅިވަޑައިގަތުމަށް ރައީސް ނަޝީދަށް ދައުވަތު އަރުވާފައެވެ. އަދި އެމަނިކުފާނަށް ތާއީދު ކުރެއްވި ބޭފުޅުންނަށް ޝުކުރު އަދާ ކުރައްވާ ވާހަކަދައްކަވަމުން ރައީސް ވިދާޅުވީ، މިހާރު ވާދަވެރިކަން ވަނީ ނުމުމަކަށް އައިސްފައިކަމަށެވެ. އެހެންކަމުން ދެން ވާދަވެރިންވެސް ޕާޓީގެ މިސްރާބަށް ވާސިލުވުމަށް މަސައްކަތްކުރަންވީ ވަގުތު ޖެހިފައިވާކަމަށް އެމަނިކުފާނު ވަނީ ވިދާޅުވެފައެވެ.
ރައީސް ނަޝީދުގެ ކެމްޕެއިން ޓީމުންވަނީ ޕްރައިމަރީގެ ވަގުތީ ނަތީޖާ އިއުލާނު ކުރުމާއި އެކު، ޕްރައިމަރީގެ ނަތީޖާ ޝީޓުތަކުގައި މައްސަލަތަކެއް ހުރިކަމަށް ފާހަގަކޮށް ބަޔާނެއް ނެރިފައެވެ. ފިކުރެއްގެ ދިރުން ޓީމުން ބުނެފައިވާގޮތުން، ބައެއް ފޮށިތަކަށް ވޯޓު އެޅުމަށް ހައްގު އޮތް މިންވަރަށްވުރެ ގިނަ އަދަދެއްގެ މީހުން ވޯޓު އަޅާފައިވެއެވެ. އެހެންކަމުން އެ ޓީމުން އަދި ނަތީޖާތައް ދިރާސާކުރާނެކަމަށް ބުނެފައިވެއެވެ.
ބައެއް މީޑިއާތަކުން ރިޕޯޓުކޮށްފައިވާގޮތުން، ރައީސް ނަޝީދު ޕްރައިމަރީގެ ވޯޓުގެ ނަތީޖާ ގަބޫލެއް ނުކުރައްވައެވެ.
One Response
ނަތީޖާ ޤަބޫލްނުކޮށް ހުރެބަލަ