އިދިކޮޅު ކޮންގްރެސް ކޯލިޝަނުގައި ތިބީ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ސަލާމަތްކުރުމަށް އުޅުއްވާ ބޭފުޅުން ނޫންކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން ކުރެއްވި ޓުވީޓެއްގައި ވިދާޅުވެފައިވަނީ އިހުލާސްތެރިކަމާއިއެކު ރައީސް ޔާމީން ސަލާމަތްކުރުމަށް އުޅުއްވާ ބޭފުޅުންނަށްވުރެ، އިދިކޮޅުގެ ލީޑަރޝިޕްގައި ގިނައީ އެހެން މަގްސަދެއް ހާސިލްކުރައްވަން އުޅުއްވާ ބޭފުޅުންކަމަށެވެ. އަދި މިކަން ދަނީ އެއް ދުވަހުން، އަނެއް ދުވަހަށް ހާމަވާ މިންވަރު ބޮޑުވަމުންކަމަށް އިމްރާން ވިދާޅުވިއެވެ.
Ikhlaastherikamaaeku RY salaamaiy kurumah ulhuhvaa beyfulhunnahvure, leadeship gai ginaee ehen maqsadheh haasilkurahvan ulhuhvaa beyfulhunkan ehdhuvahun anehdhuvahah haamavaa mivaru boduvamun eba dhe’eve.
— Imran Abdulla (@ShimranAb) February 3, 2023
ރިޔާސީ އިންތިހާބުގައި ވާދަ ކުރުމަށް އިދިކޮޅުގެ ރިޔާސީ ޓިކެޓު ރައީސް ޔާމީނާއި ހަވާލު ކުރި ނަމަވެސް އެމަނިކުފާނު ހުންނެވީ ހުކުމެއްގެ ސަބަބުންކަމަށްވުމާއި އެކު އެމަނިކުފާނަށް ރިޔާސީ އިންތިހާބުގައި ވާދަ ކުރުމަށް ވަނީ ހުރަސް އެޅިފަ އެވެ. ރައީސް ޔާމީން ހުކުމެއްގައި ހުންނެވުމުގެ ސަބަބުން، އެމަނިކުފާނު ނޫން އިތުރު ކެނޑިޑޭޓަކަށް ފުރުސަތު ދޭން ޖެހޭކަމަށް ގިނަ ބަޔަކު ބުނަމުން ދާތީ ޝުޖާއު ވިދާޅުވީ ރައީސް ޔާމީންގެ ނަން ވޯޓު ކަރުދާހުގައި އޮންނާނެ ކަމަށެވެ.
ރައީސް ޔާމީނަށް ފުރުސަތު ނެތްކަމަށް ފާހަގަކުރާ ވާހަކަތަކަށް ޕީޕީއެމް އިން ވަކި ޖަވާބެއް ދީފައި ނުވާއިރު، ބާއްވާ ޖަލްސާތަކުގައި އާއި އަދި ނުސްވެރިންގެ ބައްދަވުންތަކުގައިވެސް ތަކުރާރުކޮށް ފާހަގަކުރަމުން އަންނަނީ އަދިވެސް އިދިކޮޅުގެ ރިޔާސީ ކެޑިޑޭޓަކީ ރައީސް ޔާމީންކަމަށެވެ.
ނަމަވެސް ބައެއް ފަރާތްތަކުން ބުނާ ގޮތުގައި އިދިކޮޅުގެ ބައެއް ބޭފުޅުން މަސައްކަތްކުރަނީ ރިޔާސީ ޓިކެޓު ހޯދުމަށެވެ. އަދި ރައީސް ޔާމީންގެ މައްސަލަ އިސްތިއުނާފުކުރުން ލަސްވަނީވެސް އިދިކޮޅުގައި ތިއްބެވި ބޭފުޅުން ރައީސް ޔާމީން ސަލާމަތްކުރުމަށް ބޭނުންނުވާތީކަމަށް ބައެއް ފަރާތްތަކުން ގަބޫލުކުރެއެވެ.
