މާލޭގެ ފިހާރައެއްގައި މީހަކަށް ތޫނު އެއްޗެއް ބޭނުންކޮށްގެން ހަމަލާ ދިން މައްސަލައިގައި ހައްޔަރުކުރި މީހާގެ ބަންދަން ކޯޓުން 15 ދުވަސް ޖަހައިފިއެވެ.
ގޭންގު މާރާމާރީތަކެއް ފެށި، ހިނގައި ދިޔަ ހަމަނުޖެހުމެއްގެ ތެރެއިން މަލޭގެ ފިހާރައެއްގެ ތެރޭގައި ވަޅިން މީހަކަށް ހަމަލާ ދިން މައްސަލައިގައި ހައްޔަރު ކުރީ 20 އަހަރުގެ ދިވެހި ފިރިހެނެކެވެ.
އޭނާއަކީ ހަމަލާ ދިނުމުގައި އަމަލީ ގޮތުން ބައިވެރިވި މީހެއްކަމަށް ކޮމިޝަނާރ އޮފް ޕޮލިސް މުހައްމަދު ހަމީދު ވިދާޅުވެ އެވެ. ކޮމިޝަނަރު ވިދާޅުވީ ހަމަލާ ދިންކަމުގެ ތުހުމަތު ކުރެވޭ މީހާ ހައްޔަރު ކުރީ ކޯޓު އަމުރެއްގެ ދަށުން ރޭ ކަމަށެވެ.
ފެބުރުވަރީ 24 ވަނަ ދުވަހުގެރޭ، މާފަންނު ފިހާރައެއްގެ ތެރޭގައި ތޫނު ހަތިޔާރު ބޭނުންކޮށްގެން މީހަކަށް ހަމަލާދިނުމުގައި އަމަލީ ގޮތުން ބައިވެރިވި އެކަކު، ފުލުހުންގެ ތަހުގީގަށް ހޯދުނު ހޯދުމުގެ މައްޗަށް، ކޯޓު އަމުރެެއްގެ ދަށުން ރޭ ދަންވަރު ހައްޔަރުކުރެވިފައިވޭ. #ގޭންގުމާރާމާރީ
— Mohamed Hameed (@M_Hameedh) February 26, 2023
ހައްޔަރު ކުރި މީހާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ދީފައި ވަނީ 15 ދުވަހެވެ.
މި ހަމަލާދީފައި ވަނީ މާފަންނު މުރަނގަ މަގުގައި ހުންނަ ކްރަސާ ނަމަކަށް ކިޔާ ކޮސްމެޓިކްސް ވިއްކާ ފިހާރައެއްގައެވެ. ހެލްމެޓް އަލައި މޫނު ފޮރުވައިގެން ތިބި ބަޔަކު ހަމަލާދީފައިވަނީ، އުމުރުން 30 އަހަރުގެ އައްޑޫ ސިޓީއަށް ނިސްބަތްވާ ޒުވާނަކަށްކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ.
މިހާރު އެ ޒުވާނާއަށް އައިޖީއެމްއެޗުގައި ފަރުވާދެމުން އަންނައިރު، އެމީހާގެ ހާލު ސީރިއަސް އެވެ. ހޮސްޕިޓަލުން ބުނިގޮތުގައި އޭނާއަށް ފަރުވާދެމުންދަނީ ވެންޓިލޭޓަރުގަ އެވެ.
