އައްޑޫ ސިޓީ ހިތަދޫ ފެން ޕްލާންޓް ހުންނަ ސަރަހައްދުގައި ހުރި ކުނިތަކެއްގައި ރޯވި އަލިފާން، އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުން ކާމިޔާބުކަމާއެކު ނިއްވާލައިފިއެވެ.
މި ހާދިސާގެ ރިޕޯޓު އެމްއެންޑީއެފް ސަދަން އޭރިއާ ކޮމާންޑަށް ލިބިފައިވަނީ ރޭ އިރުއޮއްވި 18:35 ހާއިރުއެވެ. އެމްއެންޑީއެެފުން ބުނީ ހާދިސާގެ މައުލޫމާތު ލިބުމާއެކު ހިތަދޫ ފަޔަރ ސްޓޭޝަނުގެ ފަޔަރފައިޓަރުން ވަނީ ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފެށި ކަމަށެވެ.
ފަޔަރފައިޓަރުން ކުރި ހިތްވަރުގަދަ މަސައްކަތުން، ރޯވެފައިވާ އަލިފާންގަނޑު އެއްކޮށް ނިއްވާލެވުނީ ރޭ 19:00 ހާއިރުއެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.
މި ހާދިސާ ހިނގަން މެދުވެރިވި ސަބަބެއް އަދި ސާފުވެފައެއް ނުވެއެވެ. އަލިފާނުގެ ހާދިސާތަކުން ރައްކާތެރިވުމަށް ޓަކައި ކުނި އެޅުމާއި ނައްތާލުމުގައި ސަމާލުވުމަށް ކަމާބެހޭ ފަރާތްތަކުން އިލްތިމާސްކުރެއެވެ.
