ނެދަލޭންޑްސްގައި ގުރުއާން ވީދި މައްސަލަ ރާއްޖޭން ކުށްވެރިކޮށްފިއެވެ.
ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ 23 ސެޕްޓެމްބަރ 2023، ނެދަލޭންޑްސްގެ ދަ ހޭގްގައި ހުންނަ ގިނަ އެމްބަސީތަކެއް ކުރިމަތީގައި ކީރިތި ޤުރުއާނުގެ ކޮޕީތައް ފަޅާލާ ވީދި މައްސަލަ ދިވެހި ސަރުކާރުން ހަރުކަށި އިބާރާތުން ކުށްވެރިކުރާ ކަމަށެވެ.
އެގޮތުން ކީރިތި ޤުރްއާނަށް ފުރައްސާރަކޮށް ތަކުރާރުކޮށް އަދި ޢާންމުކޮށް ކުރާ ކަންކަމަކީ ޚިޔާލުފާޅުކުރުމުގެ މިނިވަންކަމުގެ ނަމުގައި ޞައްޙަ ޢަމަލެއް ނޫން ކަމަށްވެސް އެ މިނިސްޓްރީން ބުނެއެވެ. އަދި ތަފާތު ކުރުން ނުވަތަ ހަމަނުޖެހުން ހިންގުމަށް ހިތްވަރު ލިބޭ ފަދަ ދީނީ ނަފްރަތު އުފެދޭ ފަދަ އަމަލުތަކަށް އެޑްރެސްކޮށް، ހުއްޓުވައި، ދައުވާކޮށް، އެކަމަށް ވަކާލާތު ކުރާ ގައުމީ ގާނޫނުތަކާއި ސިޔާސަތުތަކާއި ގާނޫނު ތަންފީޒު ކުރާ އޮނިގަނޑުތައް ދައުލަތްތަކުން ގެންގުޅެން ޖެހޭ ކަމަށެވެ.
ދީނީ ގޮތުން ނުތަނަވަސްކަމާއި، ނެގެޓިވް ސްޓީރިއޯޓައިޕިންއާއި، ނަފްރަތާއި، މުސްލިމުންނާ ދެކޮޅަށް ހިންގާ އަނިޔާގެ މައްސަލަތައް އިތުރުވަމުންދާއިރު، މިއީ ވަރަށް ބޮޑު ނުތަނަވަސްކަމެއް ކަމަށްވެސް މިނިސްޓްރީން ވަނީ ބުނެފައެވެ.
advertisment