ފަލަސްތީނުގެ ރައްޔިތުންގެ ސަލާމަތަށް އެދި ގުނޫތު ނާޒިލާ ކިއުމަށް އިސްލާމިކް މިނިސްޓްރީން އަންގައިފި

ރާއްޖޭގެ ހުރިހާ މިސްކިތެއްގައި ގުނޫތު ނާޒިލާ އަޑު ހަރުކޮށް ކިއުމަށް އިސްލާމިކް މިނިސްޓްރީން އަންގައިފި އެވެ.

އިސްލާމިކް މިނިސްޓްރީން ނެރުނު ސާކިއުލާއެއްގައި ވަނީ އިޒްރޭލުގެ ސަހްޔޫނީ ޔަހޫދީންގެ ފަރާތުން ފަލަސްތީނުގެ ލޮބުވެތި ރައްޔިތުންނަށް ލިބެމުންދާ އަނިޔާތަކާއި، ކުރިމަތިވަމުންދާ ލާއިންސާނީ އަމަލިތަކުން ސަލާމަތްކޮށްދެއްވައި، އަމާންކަމާއި ކެތްރިކަމާއި ރައްކާތެރިކަން ދެއްވުން އެދި ރާއްޖޭގެ ހުރިހާ ރަށެއްގައިވެސް ގުނޫތު ނާޒިލާ ކިއުމަށެވެ.

އެގޮތުން ގުނޫތު އަޑު ހަރުކޮށް ކިއުމަށާއި، ނަމާދުގެ ފަހު ރަކުއަތުގެ އިއުތިދާލުގައި ކިއުމަށްވެސް މިނިސްޓްރީން އެދިލައްވާފަވެއެވެ.

މިސްކިތްތަކުގައި ގުނޫތު ކިއުމުގައި އެ މިނިސްޓްރީން ނެރުނު ސާކިއުލާގެ ފާހަގަކޮށްފައިވާ ގުނޫތު ކިއުމަށްވެސް މިނިސްޓްރީން ވަނީ ބުނެފަ އެވެ.

ފަލަސްތީނުގެ ރައްޔިތުންނާއި ދެކޮޅަށް މި ފަހަރު އިޒުރޭލުން ހަނގުރާމަ ފެށިތާ މިވަނީ ދެ މަހެއްހާ ދުވަސްވެފައެވެ. މި ހަނގުރާމައިގައި އިޒްރޭލުން ދަނީ ގިނަ އަދަދެއްގެ މުސްލިމުން ޝަހީދުކޮށް ލާއިންސާނީ އަނިޔާ ކުރަމުންނެވެ. އިޒްރޭލާއި ދެކޮޅަށް ފަލަސްތީނުގެ މުޖާހިދުން ގަދަކޮށްލާފަވާ ކަމަށް ރިޕޯޓްތައް ބުނާއިރު، ހަމާސް ޖަމާއަތުންދަނީ އިޒްރޭލާއި ދެކޮޅަށް ނުކުމެ ހަމަލާތައް އަމާޒު ކުރަމުންނެވެެ.