ޣައްޒާގައި ހިންގަމުންދާ ބޮޑެތި ޖަރީމާތަކާ ދެކޮޅަށް ހަރުކަށި ފިޔަވަޅު އެޅުމަށް އދ. އަށް ރާއްޖެއިން ގޮވާލައްވައިފި އެވެ.
ފޮރިން މިނިސްޓްރީން ބުނީ ޣައްޒާގައި ހިންގަމުންދާ ބޮޑެތި ޖަރީމާތަކާ ދެކޮޅަށް ހަރުދަނާ ފިޔަވަޅު އެޅުމަށް އދ. އަށް ރާއްޖެއިން ގޮވާލާފައި ވަނީ އދ.ގެ އާންމު މަޖިލީހުގެ 10 ވަނަ ކުއްލި ޖަލްސާގައި ކަމަށެވެ.
އެގޮތުުން އދ. އަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ތިލްމީޒާ ހުސައިން އެ ޖަލްސާގައި ވިދާޅުވީ، ޣައްޒާގައި ހިނގަމުންދާ ހަމަނުޖެހުންތަކަކީ އޮގަސްޓް މަހުގައި ހިނގި ހަމަނުޖެހުމެއް ނޫން ކަމަށާއި، އެއީ އެތައް ޒަމާނެއް ވަންދެން ހިނގަމުންދާ ހަމަނުޖެހުންތަކެއް ކަމަށެވެ.
އިޒްރޭލުން ފަލަސްތީނުގެ ރައްޔިތުންނަށް އެތައް ޒަމާނެއް ވަންދެން ހިންގަމުންދާ އަނިޔާވެރިކަމުގެ ސަބަބުން ކުށެއް ނެތް ރައްޔިތުންގެ އުއްމީދުތައް ފުނޑުފުނޑުވެފައިވާ ކަމަށާއި، ފަލަސްތީނުގެ ރައްޔިތުންގެ ގެދޮރާއި މުދާތައް ގެއްލި ނިކަމެތި ވެފައިވާ ކަމަށެވެ.
ތިލްމީޒާ ވިދާޅުވީ ޣައްޒާގައި ދިރިއުޅޭ ދެ މިލިއަން މީހުންގެ ތެރެއިން ދެބައިކުޅަ އެއްބަޔަކީ ކުޑަކުދިން ކަމަށާއި، މި ކުޑަކުދިންގެ ފުރާނަ ގެއްލުމަކީ ގަބޫލުކުރެވޭނެ ކަމެއްނޫން ަކަމަށެވެ. މިއީ ބައިނަލްއަގްވާމީ ގާނޫނުތަކާ ވަރަށް ބޮޑަށް ހިލާފު ކަމެއް ކަމަށްވެސް ތިލްމީޒާ ވަނީ ފާހަގަ ކުރައްވާފައެވެ.
މީގެ އިތުރުން ތިލްމީޒާ ވިދާޅުވީ ސުލްޙަމަސަލަސް ކަމުގެ މައްޗަށް ބިނާވެފައިވާ ދުނިޔެއަކަށްޓަކައި، ފަލަސްތީނުގެ ރައްޔިތުުންނަށް އެހީވުމަށް ގޮވާލައްވާ ކަމަށެވެ.