20 ވަނަ މަޖިލީހުގެ މެމްބަރުން ހުވާކޮށްފި

20 ވަނަ ރައްޔިތުންގެ މަޖިލީހުގެ މެމްބަރުން ހުވާކުރައްވައިފިއެވެ.

މަޖިލީހުގެ ތަޅުމުގައި ބޭއްވި މި ރަސްމިއްޔާތުގައި މެމްބަރުންނަށް ހުވާލާ ދެއްވީ އުއްތަމަ ފަނޑިޔާރު މުއުތަސިމް އަދުނާންއެވެ.

20 ވަނަ ރައްޔިތުންގެ މަޖިލީހުގައި ތިއްބަވާ މެމްބަރުން ހުވާ ކުރެއްވީ މިއަދު މަޖިލީހުގައި ކުރިއަށް ގެންދިޔަ ހަފްލާގައެވެ. 20 ވަނަ ރައްޔިތުންގެ މަޖިލީހުގައި މެޖޯރިޓީ އޮތީ ޕީއެންސީގެ ކަމަށްވާއިރު، އެމްޑީޕީގެ މެމްބަރުންގެ އިތުރުން އަމިއްލަ ގޮތުންވެސް ބައެއް މެމްބަރުން މަޖިލީހުގައި ދާއިރާތައް ތަމްސީލުކުރައްވާނެއެވެ.

ރައްޔިތުންގެ މަޖިލީހުގެ އިންތިހާބުގައި ޕީއެންސީއަށް ކާމިޔާބުކުރެވުނީ 66 ގޮނޑިއެެވެ. އެހެންނަމަވެސް އަމިއްލަ ގޮތުން ވާދަކުރައްވައި އިންތިހާބު ކާމިޔާބުކުރެއްވި ބައެއް މެމްބަރުންވަނީ ޕީއެންސީ އާއި ގުޅިފައެވެ. އެހެންކަމުން އެ ޕާޓީގެ ޕީޖީ ގުރޫޕުގެ އަދަދު 75 އަށް އަރާއިރު، އެމްޑީޕީގައި ތިއްބެވީ 12 މެމްބަރުންނެވެ. އެމްއެންޕީގެ މެމްބަރުންނާއި ޖޭޕީގެ އިތުރުން އެމްޑީއޭއިންވެސްވަނީ މި އިންތިހާބުގައި ގޮނޑިތަކެއް ކާމިޔާބުކޮށްފައެވެ.

މި ދައުރުގައި މަޖިލީހުގެ ރައީސްކަން ކުރައްވާނީ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ކަމަށްވާއިރު، ނައިބުރައީސްކަމަށް އައްޔަނުކޮށްފައިވަނީ ދިއްގަރު ދާއިރާއަށް އިންތިހާބުވެފައިވާ އަހުމަދު ނާޒިމްކަމަށް ޕީއެންސީއިންވަނީ މީޑިއާތަކަށް މައުލޫމާތު ދީފައެވެ./