ށ. ޅައިމަގު ބޯޓެއްގައި މަސައްކަތް ކުރަމުން ދިޔަ ބަންގްލަދޭޭޝްގެ ރައްޔިތެއް ކަމަށްވާ ލުތުފަރު މަރާލި މައްސަލައިގައި ތިން މީހެއްގެ މައްޗަށް ދައުލަތުން އުފުލާފައިވާ ދައުވާ ސާބިތު ކުރުމަށް ގިނަ ހެކިތަކެއް ދައުލަތުން ހުށަހަޅައިފިއެވެ.
ށ ޅައިމަގު ކުރިމަގު ބޯޓުގައި މަސައްކަތް ކުރަމުންދިޔަ ބަންގްލަދޭޝްގެ ރައްޔިތެއް ކަމަށްވާ ލުތުފަރު ގެއްލިގެން އެންމެ ފުރަތަމަ ރިޕޯޓުކޮށްފައިވަނީ 2019 ވަނަ އަހަރުގެ އޭޕްރިލް މަހުގެ 22 ގައެވެ. ލުތުފަރު ގެއްލިގެން އޭނާ ހޯދުމުގެ މަސައްކަތް ކުރިޔަށް ގެންދަނިކޮށް، އޭނާގެ ހަށިގަނޑުގެ ބައިތަކެއް ފެނިފައިވަނީ ކަނޑުގެ އަޑީންނެވެ.
ލުތުފަރު މަރާލީ، އޭނައާ އެކު އެއް ބޯޓުގައި މަސައްކަތްކުރި މީހުންނާ އެކު ގަދަކަމުން އެއް ޖިންސުން ގުޅުން ހިންގަން އުޅޭތީ އެކަމާ ހިތްހަމަނުޖެހިގެންނެވެ. އެ ވާހަކަތައް ބިދޭސީން ވަނީ ފުލުހުންނަށް ކިޔާ ދީފައެވެ. ކައްކާއެއްގެ ގޮތުގައި މަސައްކަތްކުރާ ލުތުފަރުގެ މަރާ ގުޅިގެން، އެ ބޯޓުގައި މަސައްކަތްކުރާ ހަތަރު ބިދޭސީއަކު ހައްޔަރުކޮށްފައިވެއެވެ. ހައްޔަރުކުރީ ބޯޓުގައި މަސައްކަތްކުރާ އަލަމިންނާއި ނޫރުލް އިސްލާމް އާއި އެމް.ޑީ އަހުތަރު ހުސެއިނާއި ހަނީފް ބްރަދާއެވެ.
ލުތުފަރު މަރާލި މައްސަލާގައި ދައުލަތުން ދައުވާކުރާ ތިން ބިދޭސީން ކުށަށް އިއުތިރާފްވުމަށް ފަހު އެކަމަށް ފަހުން އިންކާރު ކޮށްފައިވާތީ އެ މައްސަލައިގެ ތަހުގީގު ފުރިހަމަ ކުރުމަށްޓަކައި އެ މައްސަލަ ކޯޓުން ބޭރުކޮށްލީ މިދިޔަ އަހަރުގެ ޖުލައި މަހުގެ ތެރޭގައެވެ. އެ ތިން މީހުންގެ މައްޗަށް ކުރަނީ އެނގިހުރެ މީހަކު މެރުމުގެ ދައުވާ އެވެ. އެ ކުށަށް ކުރިން އެ މީހުން އިއުތިރާފްވެ، ޖިނާއީ އިޖްރާއާތުގެ ގާނޫނުގެ ދަށުން ދައުލަތާ އެކު އިއުތިރާފްގެ އެއްބަސްވުމެއް ސޮއި ކުރިޔަސް، ފަހުން އެ މީހުން ވަނީ ކޯޓުގައި އެކަމަށް އިންކާރުކޮށްފަ އެވެ.
ލުތުފަރުގެ މަރުގެ މައްސަލައިގައި މިއަދު ކުރިޔަށް ގެންދިޔަ ޝަރީއަތުގެ މަޖިލީހުގައި ދައުލަތުން ވަނީ ގިނަ ހެކިތަކެއް ހުށަހަޅާފައެވެ.
ބިދޭސީން ވަނީ ލުތުފަރުގެ މަރުގެ މައްސަލައިގައި މީގެ ކުރިން ޝަރީއަތަށް ދިން ބަޔާން އިންކާރުކޮށްފައެވެ. ދިފާއުގައި ހެއްކެއް ހުށަނާޅާ އަލަމިން އާއި ނޫރުލް އިސްލާމްގެ ވަކީލް ބުނެފައިވަނީ އެ މީހުން ބަންދުގައި ތިބޭތާ އަހަރަކަށް ވުރެ ގިނަ ދުވަސްވެފައިވާއިރު، އާއިލާއަށް ދަތިތަކެއް ދިމާވަމުން ދާ ކަމަށް ބުނެފައެވެ. އެހެން ކަމުން މައްސަލަ ވީހާވެސް އަވަހަށް ނިންމާލުމަށް، ޝަރީއަތުގެ ތާވަލެެެއް ފޯރުކޮށްދިނުމަށް އޭނާ އެދުނެވެ. އެކަމަށް އެއްވަސްވެ، ގާޒީ ވިދާޅުވީ މައްސަލަ ކުރިޔަށް ގެންދާނެ ގޮތުގެ ޓައިމްލައިނެއް ވަކީލަށް ފޯރުކޮށްދޭނެ ކަމަށެވެ.
ފުލުހުން ނޫސްވެރިންނަށް، ހަށިގަނޑުގެ ބައިތަކުގެ ފޮޓޯތަކެއް ވެސް ދެއްކިއެވެ. އޭގެ ތެރޭގައި ވަކިވަކިން ހުރި ކަށިތަކަކާއި ކަރުން ފެށިގެން މައިބަދަ އެއްްކޮށް އޮތް ކަށިގަނޑަކާއި ވަކިން އޮތް ބޮލުގެ ނާށިގަނޑު ހިމެނެއެވެ. ލުތުފަރުގެ ހަށިގަނޑުގެ ކަށިތައް އެކަނި ހުރީ، އެ ކަށިތައް ފެނިފައި ވަނީ އޭނާ ކަނޑުފެއްތިތާ 15 ވަރަކަށް ދުވަސްވެފައިވެ، މަސްގަނޑު ވަކިވެފައިވުމުންނެވެ.
advertisment