ހޯރަފުށީގައި މިރޭ ހަވާ އަރުވަނީ

ހއ.ހޯރަފުށީގައި މިރޭ ހަވާ އެރުވުމަށް ނިންމައިފިއެވެ.

މިއީ ހޯރަފުށި އެއާޕޯޓު ހުޅުވުމުގެ އުފަލުގައި ކުރަން ނިންމާފައިވާ ކަމެކެވެ.

ހޯރަފުށީގައި ހަވާ އެރުވުމަށް ނިންމާފައިވަނީ މިރޭ 8:30 ގައެވެ.

ހޯރަފުށީ އެއާޕޯޓު ރަސްމީކޮށް ހުޅުވުމަށް ހަމަޖެހިފައިވަނީ މިއަދު ހަވީރު 4 ޖަހާއިރުއެވެ.

އެއާޕޯޓު ރަސްމީކޮށް ހުޅުއްވައިދެއްވާނީ ރައީސް އިބްރާހިމް މުހައްމަދު ސޯލިހެވެ. އެމަނިކުފާނު ވަނީ އެއާޕޯޓު ހުޅުވުމަށް މިއަދު މެންދުރު އެ ރަށަށް ވަޑައިގެންފައެވެ.

ހޯރަފުށީ އެއާޕޯޓު ރަސްމީކޮށް ހުޅުވުމުގެ ގޮތުން މިދިޔަ ހޯމަ ދުވަހު ވަނީ ޓެސްޓު ފްލައިޓެއް ޖައްސާފައެވެ.

ހޯރަފުށީ އެއާޕޯޓަކީ 1200 މީޓަރު ދިގު، 35 މީޓަރު ފުޅާ ރަންވޭއަކާއި އެކު ހަދާފައިވާ އެއާޕޯޓެކެވެ.