އައްޑޫ އަށް އަސްތައް ގެނެސްފި

އައްޑޫ ސިޓީ އަށް ގެންނަން ނިންމާފައިވާ އަސްތައް، އެ ސިޓީ އަށް މިއަދު ގެނެސްފިއެވެ.

މި އަސްތައް ގެނެސްފައިވަނީ މޯލްޑިވްސް ސްޓޭޓް ޝިޕިންގ (އެމްއެސްއެސް) މެދުވެރިކޮށެވެ. މިއީ އެ ބޯޓުގައި ދިރޭ ޖަނަވާރުތަކެއް އުފުލި ފުރަތަމަ ފަހަރުވެސް މެއެވެ.

އައްޑު އަށް ގެނެސްފައިވަނީ ތިން އަސް ކަމަށްވާއިރު، އަސްތައް ރަނގަޅަށް ބަލަހައްޓާނެ ކަމުގެ ޔަގީންކަން މި ތަކެތި ގެނައި ފޭދޫގެ ސަދަން ސްޓޭލިއަންސް ކުންފުނިން ވަނީ ދީފައެވެ.

އެގޮތުން ސަދަން ސްޓޭލިއަންސް އިން ބުނީ މި އަސްތައް ޝިޕް ކުރުމުގެ މާކުރިން ވެސް އެ ތަކެއްޗަށް ބޭނުންވާ ވެޓިނަރީގެ ހިދުމަތާއި، ކާ ތަކެތި އަދި ބޭހުގެ ކަންކަން ހަމަޖައްސާފައިވާ ކަމަށެވެ.