މާބަނޑު މީހުން ފާއިޒާ ވެކްސިން ޖަހަން ހުޅުވާލައިފި

މާބަނޑު އަންހެނުންނަށް ފައިޒާ ވެކްސިން ޖެހުމަށް ހުޅުވާލައިފިއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއުލާނުކޮށްފައިވާ ގޮތުގައި، ފައިޒާ ވެކްސިން މާބަނޑު މީހުންނަށް ޖެހުމަށްޓަކައި ރަޖިސްޓުރީވުމަށް ވަނީ ހުޅުވާލާފައެވެ. ވެކްސިން ދިނުމަށް ހަމަޖެހިފައިވަނީ ރަޖިސްޓުރީކޮށްފައިވާ މީހުންގެ ތެރެއިން ކުރިން އަންނަ މީހުންނަށް ކަމަށް އެޗްޕީއޭއިން ބުނެފައިވެއެވެ.

Pregnant women can now register for Pfizer vaccine.

Vaccination will be given for registered individuals on a first come first serve basis.

To register for Pfizer vaccine, please visit: https://t.co/hvpVd8zbhn pic.twitter.com/FDaCUzjWWE

— Health Protection Agency (@HPA_MV) May 16, 2021

ފައިޒާ ވެކްސިނަކީ ފިނިހޫނުމިން 70 ޑިގްރީގައި ބަހައްޓަންޖެހޭ ވެކްސިނެއްކަމުގައިވާތީ މި ވެކްސިން ޖަހާނީ މާލޭގައި ދިރިއުޅޭ ފަރާތްތަކަށް އެކަންޏެވެ. ފައިޒާ ވެކްސިންގެ 5،500 ޑޯޒް ރާއްޖޭގައި އެބަހުއްޓެވެ. ވެކްސިން ދިނުމަށް ހަމަޖެހިފައިވަނީ ހަށިގަނޑުގެ ދިފާއީ ނިޒާމް ދަށް ފަރާތްތަކަށް އެކަނި ކަމަށްވެސް އެޗްޕީއޭ އިން ބުނެފައިވެއެވެ. އެގޮތުން ހަށިގަނޑުގެ ދިފާއީ ނިޒާމުގެ ބާރުދެރަ މީހުންނާއި ބޮޑެތި އޮޕަރޭޝަންތައް ކޮށްފައިވާ މީހުންނާއި، ދާއިމީ ބޮޑެތި ބަލިތަކަށް ފަރުވާހޯދަމުންދާ މީހުން ހިމެނެއެވެ.

ރާއްޖޭގައި މާބަނޑު މީހުންނަށް ވެކްސިން ދިނުމާ ގުޅޭގޮތުން ގޮތެއް ނިންމާފައިވަނީ ގިނަ މަޝްވަރާތަކަކަށްފަހުގައެވެ. އެގޮތުން އެޗްޕީއޭއިން މީގެ ކުރިން ވިދާޅުވީ ރާއްޖޭގައި ކޯވިޑަށް ޕޮޒިޓިވްވާ މާބަނޑު މީހުން އިތުރުވަމުން އަންނައިރު ކުރިއާ ޚިލާފަށް މިހާރު މާބަނޑު މީހުންގެ ޙާލު ގޯސްވަމުންދާ ކޭސްތައް އިތުރުވަމުން އަންނަކަމަށެވެ. މީގެކުރިން ބައްޔަށް ޕޮޒިޓިވްވާ މީހުންގެ ޙާލަތު ގޯސްވެގެން އައިސީޔޫއަށް ލާންޖެހޭފަދަ ޙާލަތަކަށް ނުދިޔަނަމަވެސް މިހާރު މާބަނޑު މީހުންނަށް އައިސީޔޫގައި ފަރުވާދޭންޖެހޭ ނިސްބަތްވަނީ އިތުރުވެފައެވެ.

ކޮވިޑް-19އަށް ފަރުވާކުރުމުގައި އައިޖީއެމްއެޗުގައި ޙަރަކާތްތެރިވާ އެހޮސްޕިޓަލްގެ އެތެރެހަށީގެ ޑޮކްޓަރ މުޙައްމަދު ޢަލީ ވިދާޅުވީ މިހާރުވެސް 50 މީހުންނާއި ގާތަށް މާބަނޑު މީހުން ރާއްޖޭގައި ޕޮޒިޓިވްވެފައިވާކަމަށެވެ. އަދި މީގެތެރެއިން އެކަކަށް ވެންޓިލޭޓަރުގައި އަންނަނީ ފަރުވާދެމުންކަމަށްވެސް މުޙައްމަދު ޢަލީ ވިދާޅުވެފައިވެއެވެ.

މާބަނޑު މީހުންނަށް ފައިޒާ ވެކްސިން ދިނުމަށް ނިންމާފައިވާއިރު ފައިޒާ ވެކްސިނަކީ މިހާތަނަށް ރާއްޖޭގައި ދެމުން އަންނަ، ރައްކާތެރިކަން އެންމެ ބޮޑު އެއް ވެކްސިންއެވެ. ފައިޒާ ވެކްސިން ރާއްޖޭގައި ދޭން ފަށާފައިވަނީ މިދިޔަ އޭޕްރިލް މަހުގެ 11ވަނަ ދުވަހުއެވެ.