ސްރީލަންކާގެ ކުންފުންޏެއް ކަމަށްވާ، އޭޝިއަން އެކަޑެމީ އޮފް އެއޮރޮނޮޓިކްސް (އޭއޭއޭ) އިން އައްޑޫ ސިޓީ ގަމުގައި ހިންގަމުން އައި ފްލައިން ސްކޫލްގެ ހިންގުމާއި ހަވާލުވުމަށް ކަމަށް ބުނެ އެވިޑް ކޮލެޖާއި އޭއޭއޭ އާއި ދެމެދު ހެދި އެއްބަސްވުން ބާތިލުކޮށްފިއެވެ.
އޭއޭއޭގެ ހާލަތު ބޮއްސުންލައިގެން ދިއުމުން، އެ ތަނުގެ ހިންގުމާ މިދިޔަ ޖޫން މަހު ވަނީ ރާއްޖޭގައި މަތީ ތައުލީމު ފޯރުކޮށްދޭ އެވިޑް ކޮލެޖުން ހަވާލުކޮށްފައެވެ.
އެއްބަސްވުން ބާތިލުކުރިކަން އެވިޑުން ހާމަކުރީ ފްލައިން ސްކޫލްގެ ދަރިވަރުންނާއެކު މިއަދު މެންދުރު ބޭއްވި ބައްދަލުވުމެއްގައެވެ.
އެ ބައްދަލުވުމުގައި އެވިޑްގެ ޗެއާމަން އަބްދުﷲ މުޝްތާގް ރަޝާދު ވިދާޅުވީ އެއްބަސްވުން ބާތިލުކުރީ ސަރުކާރުގެ ބައެއް މުއައްސަސާތަކުން ލިބެންޖެހޭ އެއްބާރުލުން ނުލިބުމުން ކަމަށާއި ފްލައިން ސްކޫލް ހިންގުމަށް ކުރަމުން އައި ހުރިހާ މަސައްކަތްތަކެއް މިހާރު ހުއްޓާލާފައިވާ ކަމަށެވެ.
މައުލޫމާތު ލިބިފައިވާ ގޮތުން އޭއޭއޭ އާ އެކު ހެދި އެއްބަސްވުން ބާތިލް ކުރި ނަމަވެސް ކުރިއަށް އޮތް ދުވަސްތަކުގައި އެވިޑްގެ އަމިއްލަ ފްލައިން ސްކޫލެއް ފަށަން ރާއްޖޭން ބޭރު ފްލައިން ސްކޫލްތަކާ ވަނީ މަޝްވަރާކޮށްފައެެވެ.