ރައީސުލްޖުމްހޫރިއްޔާގެ އޮފީސް ގޮއްވާލާނެ ކަމުގެ އިންޒާރު ދިން މީހަކު ކޯޓު އަމުރެއްގެ ދަށުން ހައްޔަރުކޮށްފި އެވެ.
ޓެރަރިޒަމްގެ އަމަލެއް ހިންގަފާނެކަމުގެ އިންޒާރު ދިން މީހަކު ހައްޔަރުކޮށް ފުލުހުންގެ މީޑިއާ އޮފިޝަލް ވިދާޅުވީ، އުމުރުން 34 ގެ އެ މީހާ އިންޒާރު ދިނީ ރައީސް އޮފީހުގެ ސެކިއުރިޓީ ބަލަހައްޓަން ތިބި އެމްއެންޑީއެފް އޮފިސަރުންނަށް އަމާޒުކޮށް ކަމަށެވެ. އަދި ރައީސް އޮފީހުގައި ތިބި ވެރިން ތަނުގެ ތެރެއިން ނުނިކުތުމަށާއި، އެހެން ނޫންނަމަ ތަން ގޮއްވާލާނެކަމަށް ބުނެ އިންޒާރު ދިންކަމަށް ފުލުހުން ބުންޏެވެ.
ފުލުހުން ބުނީ މި މައްސަލައިގައި ހައްޔަރު ކުރީ ދިވެހި ފިރިހެނެއްކަމަށެވެ. އަދި އޭނާގެ ބަންދާއި މެދު ގޮތެއް ނިންމުމަށް ހުޅުމާލެ ކޯޓަށް ހާޒިރު ކުރުމުން ބަންދުގައި ބަަހައްޓައި މައްސަލަ ތަހުގީގު ކުރުމަށް 07 ދުވަސް ދީފައިވާ ކަމަށެވެ.