ރ. ރަސްމާދޫ ދެކުނު ފަރާތުގެ ގޮނޑުދޮށް ހިމާޔަތް ކުރުމުގެ މަޝްރޫއު ހައުސިން އެންޑް އިންފްރާންސްޓްރަކްޗާ މިނިސްޓްރީގެ ފަރާތުން އެމްޓީސީސީ އާއި ހަވާލުކޮށްފިއެވެ.
މި މަޝްރުއު ހަވާލުކުރުމަށް ބޭއްވި ރަސްމިއްޔާތުގައި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ އާދަމް އާޒިމެވެ. އަދި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ފާތުމަތު ޝާނާ ފާރޫގެވެ.
މިކަމާއި ގުޅިގެން އެމްޓީސީސީ މައުލޫމާތުދެމުން ވަނީ 901 މީހުންގެ އާބާދީގެ ރަސްމާދޫއަކީ ރަށް ގިރުމުގެ ބިރުވެރިކަން ޒަމާނުންސުރެ ތަހައްމަލުކުރަމުން އައިސްފައިވާ ރަށެއްކަން ފާހަގަކުރައްވާފައެވެ. އަދި ބިމުގެ ބޮޑު މިނުގައި 26 ހެކްޓަރު ހުންނަ މި ރަށުން ރަށް ގިރުމުގެ ސަބަބުން ވަށައިގެން އެތަކެއް ގެއްލުމެއް ލިބިފައިވާކަމަށްވެސް އެމްޓީސީސީ އިން ބުނެފައިވެއެވެ.
އެމްޓީސީސީ އާއި ހަވާލުކުރި މަޝްރޫއުގެ ދަށުން 157 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި 283 މީޓަރުގެ ސަރަހައްދެއްގައި ގްރޮއިން ޖެހުމާއި 2،500 ކިއުބިކް މީޓަރުގެ ވެލި ގޮނޑުދޮށަށް އަޅާނެއެވެ.
ރަސްމާދޫ ދެކުނު ފަރާތުގެ ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ ހަވާލުކުރީ 17.88 މިލިއަން ރުފިޔާއަށް، 210 ދުވަހުގެ ތެރޭގައި ނިންމާ ގޮތަށެވެ.
އެމްޓީސީސީން ބުނީ، މި މަސައްކަތް ނިންމާލެވުމުން ރަސްމާދޫ ރައްޔިތުންނަށް ދިމާވެފައިވާ ރަށްގިރުމުގެ މައްސަލައަށް ބޮޑުތަނުން ހައްލު ލިބިގެންދާނެ ކަމަށާއި، އަދި އެ ރަށުގެ ރައްޔިތުންގެ ޒަމާންވީ އުދާސްތަކާއި ތަކުލީފަށް ބޮޑު ހައްލެއް ލިބި ރައްޔިތުންނަށް އެތައް ގުނައަކުން އުފާވެރިކަމާއި ތަސައްލީ ގެނުވާނެ ކަމަށެވެ.
advertisment