ގަވާއިދާއި ހިލާފަށް ތިލަފުށިން ވިއްކާ ބިންތައް ރައީސް ޔާމީންގެ ސަރުކާރުގައި އަތުލާނެކަމަށް އިދިކޮޅުގެ އިސް ސަފުގައި ހަރަކާތްތެރިވާ ޕީއެންސީގެ ނައިބު ރައީސް އިބްރާހީމް ޝުޖާއު ވިދާޅުވެއްޖެއެވެ.
ތިލަފުށިން ބިދޭސީންނަށް ބިން ވިއްކުން ހުއްޓާލުމަށް ގޮވާލައި މަޖިލީހަށް މަޑުއްވަރީ ދާއިރާގެ މެމްބަރު އަދާމް ޝަރީފް އުމަރު ބިލެއް ހުށައަޅުއްވާފައިވީ ނަމަވެސް އެ ބިލު ވަނީ ބޭރުކޮށްލާފައެވެ. އާދަމް ޝަރީފް އުމަރު ވިދާޅުވީ، ގްރޭޓާރ މާލޭގެ ގޮތުގައި ބެލެވޭ ތިލަފުއްޓަކީ ދިވެހި ރައްޔިތުންގެ ބައިތުލްމާލުން ހަރަދުކޮށްގެން ތަރައްގީ ކުރަމުން އަންނަ ދިވެހިރާއްޖޭގެ ސިނާއީ މަސައްކަތްތަކަށް ހާއްސަ ކުރެވިފައިވާ ރަށެއްކަމަށެވެ.
އެނާ ވިދާޅުވީ، ބިމުގެ ދަތިކަން މާލޭ ސަރަހައްދުގައި ހުރި ވިޔަފާރިތަކަށް ކުރިމަތިވެފައިވާ އިރު، ބީލަމުގެ އުސޫލުން ބިދޭސީންނަށް 99 އަހަރަށް ބިން ވިއްކުމުން ދިވެހި ވިޔަފާރިވެރިންނަށް ނޭދެވޭ އަސަރުތަކެއް ކުރާކަމަށެވެ. އަދި އެކަމުގެ އަސަރުތައް ދިވެހި އިގްތިސާދަށްވެސް ކުރާނެކަމަށާއި ބިން ގަތުމުގެ ވާދަވެރިކަމުގެ ތެރޭގައި ކުދި އަދި މެދުފަންތީގެ ވިޔަފާރިތަކަށް ބިދޭސީންނާއި ވާދަ ކުރަންޖެހޭނެ އުސޫލެއް އޮތުމުން ދިވެހިންނަށް ވިޔަފާރީގެ ފުރުސަތުތައް ހަނިވެ ރާއްޖޭގެ ވިޔަފާރިތައް ކޮންޓްރޯލް ކުރުމުގެ ބާރު ބިދޭސީންނަށް ލިބިގެންދާކަމަށް އެނާ ވިދާޅުވިއެވެ.
އާދަމް ޝަރީފް ވިދާޅުވީ، ވަގުތީ މަންފާއެއް ހޯދުމަށް ނުވަތަ ރިޔާސީ އިންތިހާބަށް ނުފޫޒު ފޯރުވުމުގެ ބޭނުމުގައި ބިދޭސީންނަށް 99 އަހަރަށް ނުއަގުގައި ބިން ވިއްކުމުން ނޭދެވޭ އަސަރުތައް ކުރާނެކަމަށްވުމުން އެކަން ކުރުން ހުއްޓާލުމަށް ސަރުކާރަށް ގޮވާލާކަމަށެވެ.
ތިލަފުށިން ބިން ވިއްކުމަށް ހުޅުވާލާފައިވާކަން ހައުސިންގް ޑިވެލޮޕްމެންޓު ކޯޕަރޭޝަން (އެޗްޑީސީ) އިން އިއުލާނުކޮށްފައިވަނިކޮށް ޓުވީޓެއްކުރައްވާ ޝުޖާއު ވިދާޅުވީ ބޭރު މީހުްނނަށް ގަވާއިދާއި ހިލާފަށް ތިލަފުށިން ވިއްކާ ބިންތައް އިދިކޮޅުގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރެއްގައި އަތުލާނެކަމަށެވެ.
ބޭރުމީހުންނަށް ޤަވައިދާ ހިލާފަށް ތިލަފުށިން ވިއްކާ ބިންތައް މިއަހަރު އުފެދޭ ރައީސް ޔާމީންގެ ސަރުކާރުން އަތުލާނަން.އިންޝާالله☝🏼
މިބިމުން ވެލިފުކެއްވެސް ބޭރުގެ އެއްވެސް ފަރާތަކަށް ނުލިބޭނެ.ލިބުނަކަ ނުދޭނަން.ހުރިހާ ރައްޔިތުން ތައްޔާރުވޭ!— Ibrahim Shujau (@IbrahimShujaau) February 9, 2023
ޝުޖާއު އިތުރަށް ވިދާޅުވެފައިވަނީ ދިވެހި ބިމުން ވެލިފުކެއްވެސް ބޭރުގެ އެއްވެސް ފަރާތަކަށް ނުލިބޭނެކަމަށެވެ. އަދި އެކަން ކުރުމުގެ ފުރުސަތު ނުލިބޭނެކަމަށްވެސް ޝުޖާއު ވަނީ ވިދާޅުވެފައެވެ.
advertisment