ޓިކެޓު ހަވާލު ކުރުމުގައި ބައިވެރިނުވުމަކީ ރައީސް ނަޝީދު ހިންގި ހުތުރު އަމަލެއް: އިބްރާހިމް ޝަރީފް

ރައީސް އިބްރާހިމް މުހައްމަދު ސާލިހް އަށް އެމްޑީޕީގެ ރިޔާސީ ޓިކެޓު ހަވާލު ކުރެއްވުމުގައި އެ ޕާޓީގެ ރައީސް މުހައްމަދު ނަޝީދު ބައިވެރިވެވަޑައިނުގެންނެވި މައްސަލައިގައި މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ނުރުހުން ފާޅުކުރައްވައިފިއެވެ.

ރައީސް ސާލިހަށް އެމްޑީޕީގެ ރިޔާސީ ޓިކެޓު ހަވާލު ކުރެވިފައިވާއިރު، އެމްޑީޕީގެ ތެރޭގައިވަނީ ބޮޑެތި މައްސަލަތައް އުފެދިފައެވެ. ރައީސް ނަޝީދުވަނީ އެމްޑީޕީގެ ރިޔާސީ ޕްރައިމަރީ އަލުން ބޭއްވުމަށް ކޯޓަށް ހުށައަޅާފައެވެ. އަދި އެމަނިކުފާނާއި ތާއީދު ކުރައްވާ ފަރާތްތައް ރައީސް ސާލިހަށް ޓިކެޓު ހަވާލު ކުރުމުގެ ރަސްމިއްޔާތު ބޮއިކޮޓު ކޮށްފައިކަމަށްވެސް ބައެއް މީޑިއާ ތަކުން ރިޕޯޓުކޮށްފައިވެއެވެ.

ރައީސް ނަޝީދުގެ އަމަލުތައް ބައްޓަން ކުރެވިފައިވާ ގޮތާއިމެދު ކަންބޮޑުވުން ފާޅުކުރައްވާ ޝަރީފް ވިދާޅުވީ، ޑިކޮމްރެސީގެ ރީތި ހަމަތައް ގަބޫލު ކުރާ ކޮންމެ މީހަކުވެސް އިންތިހާބެއްގައި ލިބިގެންދާ ނާކާމިޔާބީވެސް ގަބޫލު ކުރާނެކަމަށެވެ.

Democracy ge reethi hamathah qaboolu kuraa komme meehaku inthikhaabegge bali vejje nama bali qaboolu kuraane. Adhi MDP ge Raees magaamuga hunnavaugen, @ibusolih ah ticket haavaalu kurumuge rasmiyyaathah, @MohamedNasheed vadainugathumahee varah dhereavaru huthuru amaleh

— Ibrahim Shareef (@AdduShareef) February 19, 2023

އެނާ ވިދާޅުވީ، އެމްޑީޕީގެ ރައީސްގެ މަގާމުގައި ހުންނަވައިގެން އެ ޕާޓީގެ ޕްރައިމަރީ ކާމިޔާބު ކުރެއްވި ކެނޑިޑޭޓުކަމަށްވާ ރައީސް ސާލިހަށް ޓިކެޓު ހަވާލު ކުރުމުގެ ރަސްމިއްޔާތުގައި ރައީސް ނަޝީދު ބައިވެރިވެވަޑައިނުގެންނެވުމަކީ ހިންގެވި ދެރަވަރު އަދި ހުތުރު އަމަލެއް ކަމަށެވެ.

ޝަރީފް ވިދާޅުވީ، އެމްޑީޕީ އަދި އެހެނިހެން ޕާޓީތަކުގައިވެސް ރައީސްގެ މަގާމާއި އެހެނިހެން މަގާމުތަކުގައި ތިއްބެވި ބޭފުޅުން ޕާޓީ ކުރިއެރުވުމަށާއި ޕާޓީއަށް ވެރިކަން ހޯދައިދެއްވުމަށް މަސައްކަތްކުރައްވަން ވާނެކަމަށެވެ. އަދި އެ ނޫން ގޮތަކަށް ކަންކަން ކުރުމަށް އެއްވެސް ޕާޓީއެއްގެ އަސާސީ ގަވައިދު ތަން ނުދޭކަމަށްވެސް ވިދާޅުވިއެވެ.