އަންނަ ސެޕްޓެމްބަރުމަހުގެ 9 ގައި ބާއްވާ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ މެދުގައި ސަންގު ޓީވީއިން ބާއްވާ ރިޔާސީ ބަހުސްއަށް ވަޑައިނުގެންނެވޭނެކަމަށް އެމްޑީޕީގެ ރިޔާސީ ކެންޑިޑޭޓް އަދި ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އަންގަވައިފިއެވެ.
ސަންގުގެ ރިޔާސީ ބަހުސްގައި ބައިވެރި ނުވެވޭނެކަމަށް ވިދާޅުވެ ސަންގަށް އެކަން އަންގަވާފައިވަނީ ރައީސް ޞާލިހްގެ ކެމްޕޭން މެނޭގަރ މުހައްމަދު ނާޝިޒްއެވެ.
ރިޔާސީ އިންތިޚާބުގައި ވާދަކުރައްވާ ޕާޓީތަކުގެ ކެންޑިޑޭޓުންގެ މެދުގައި ބަހުއްސެއް ބޭއްވުމަށް ސަންގުން ހަމަޖައްސައި ފޮނުވި ދަޢުވަތު އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ޞާލިހް ފިޔަވައި ހުރިހާ ކެންޑިޑޭޓުން ވަނީ ގަބޫލްކުރައްވާފައެވެ.
އެހެން ނަމަވެސް އަދިވެސް ބަހުސްގައި ބައިވެރިވުމަށް އެދި މިކަމުގައި ގޮތެއް ނިންމައިދިނުމަށް އެދި އިތުރު ސިޓީއެއް ސަންގު ޓީވީއިން ވަނީ މިރޭ ރައީސްގެ ކެމްޕޭން ޓީމަށް ފޮނުއްވާފައެވެ.
