އެމްޓީޑީސީގެ މެނޭޖިން ޑިރެކްޓަރުގެ މަގާމުން އަހުމަދު ނިޔާޒް ވަކިކޮށްފި

މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ގެ މެނޭޖިން ޑިރެކްޓަރުގެ މަގާމުގައި ހުންނެވި އަހުމަދު ނިޔާޒް މިއަދު ވަކިކޮށްފިއެވެ.

މި ސަރުކާރުގައި ނޮވެމްބަރު 2023 ގައި އެމްޓީޑީސީގެ އެމްޑީއަކަށް އައްޔަންކުރި ނިޔާޒަކީ އެ ކުންފުނީގައި އެކި މަގާމުތައް އަދާކުރައްވާފައިވާ ބޭފުޅެކެވެ. އޭނާ އެ ކުންފުނީގައި މަސައްކަތް ކުރައްވަން ފެއްޓެވީ 2007 ވަނަ އަހަރުއެވެ. ނިޔާޒް ވަނީ މީގެ ކުރިން އެމްޓީޑީސީގެ ބޯޑު ޑިރެކްޓަރުކަމާއި އޮޕަރޭޝަން އެންޑް ޑިވެލޮޕްމަންޓް މެނޭޖަރުކަން ކުރައްވައިފައެވެ.

އޭގެ އިތުރުން، 2013 އިން 2016 އަށް އެސްޓީއޯގެ ޗެއާމަންކަމާއި 2016 އިން 2018 އަށް އެމްޓީސީސީގެ ޗެއާމަންކަން ވެސް އަދާކުރެއްވިއެވެ.

ބިޒްނަސް އެޑްމިނިސްޓްރޭޝަންގެ ރޮނގުން އިނގިރޭސިވިލާތުގެ ޔުނިވާސިޓީއަކުން މާސްޓާސް ހައްދަވާފައިވާ ނިޔާޒު މަގާމުން ވަކިކުރި ސަބަބެއް މިހާތަނަށް އެނގިފައި ނުވެއެވެ.